सरकारी वार्ता टोली जिम्मेवार भएर अगाडी नबढेको आरोप

काठमाडौं, १० साउनः नेपाल चिकित्सक संघले शुक्रबारदेखि देशभरका अस्पतालमा आकस्मिक बाहेकका सबै सेवाहरु अनिश्चतकाल सम्म ठप्प पार्ने भएका घोषणा गरेको छ । १५औं पटक अनसन बसेका डा गोविन्द केसीको मागमा सरकारले सुनुवाई नगरेको भन्दै संघले आकस्मिक बाहेकका सबै सेवा ठप्प पार्ने आज आयोजित पत्रकार सम्मेलनमा जानकारी गराइएको हो ।
वार्तालाई केवल औपचारिकतामा मात्र सिमित गराइएको तथा डा केसीको जीवनरक्षाको लागि सरकारी वार्ता टोली जिम्मेवार रुपमा अगाडी नबढेको संघको आरोप छ ।
अनसनरत डा केसीको स्वास्थ्यलाई लिएर कुनै पनि बेला अप्रिय र दुःखदायी घटना हुनसक्ने परिस्थितिलाई गम्भीर रुपमा मनन गरेको पनि संघले जनाएको छ । नेपाल सरकार तथा डा केसी पक्षधर वार्ताटोलीलाई गम्भीर रुपमा प्रस्तुत भई जिम्मेवारी बोधका साथ अगाडि बढ्न संघले आग्रह गरेको छ ।
डा केसीको जीवनरक्षाका लागि संघले शुक्रबार देखि आकस्मिक सेवा बाहेकका अन्य सम्पूर्ण स्वास्थ्य सेवा अनसन नतोडिउन्जेलसम्म बन्द गर्ने जनाएको छ । डा केसी आमरण अनसनमा बसेको विषयलाई लिएर कतिपय चिकित्सक, मिडिया तथा सामाजिक सञ्जालमा झुटा, कपोकल्पित र अस्वाभाविक टिकाटिप्पणी गरिएको प्रति संघले आपत्ती जनाएको छ ।