स्वास्थ्य सेवा केन्द्रमा सिलबन्दी

काठमाडौँ, १७ साउनः अनुगमनका क्रममा क्लिनिक सञ्चालन सम्बन्धी कुनै पनि कागजातहरु फेला नपरेपछि सामाखुशी स्थित परिवार स्वास्थ्य सेवा केन्द्रमा बुधबार सिलबन्दी गरिएको छ ।
वाणिज्य, आपूर्ति तथा उपभोक्ता संरक्षण विभागले गरेको अनुगमनका क्रममा क्लिनिक सञ्चालन सम्बन्धी कुनै पनि कागजातहरु नपाइएकाले हाललाई सञ्चालक स्वयंको जिम्मामा रहने गरी सिलबन्दी गरिएको हो । सिलबन्दी गरिएको उक्त स्वास्थ्य केन्द्रलाई सात दिनभित्र सञ्चालनका लागि आवश्यक पर्ने कागजपत्र लिएर आउन पनि निर्देशन दिएको छ ।
त्यसैगरी सामाखुशीमा नै रहेको सिजन्स मेडिकल सेन्टर प्रालिलाई पनि वैदेशिक रोजगारमा जाने कामदारहरुको स्वास्थ्य परीक्षण सम्बन्धी सेवा सञ्चालन स्वीकृति नलिई सञ्चालन गरेकाले तीन दिनभित्र श्रम मन्त्रालयबाट स्वीकृति लिई विभागमा आउन निर्देशन दिएको छ ।