कोरिया जानेको स्वास्थ्य परीक्षण भदौ ४ देखि ११ सम्म हुने

हेल्थ टुडे,
काठमाडौं, २४ साउनः सन् २०१८ को रोजगार अनुमति प्रणाली (इपिएस) अन्तर्गत कोरियन भाषा परीक्षा उतीर्ण गरी उत्पादन मूलक र कृषि तथा पशुपालन तर्फ छनोट भएका उम्मेदवारको आगामी भदौ ४ देखि ११ गतेसम्म स्वास्थ्य परीक्षण हुने वैदेशिक रोजगार विभाग, इपिएस कोरिया शाखाले जनाएको छ ।
मीनभवन स्थित निजामती अस्पताल, टेकुस्थित शुक्रराज ट्रपिकल अस्पताल, गनखेल स्थित पाटन अस्पताल र थिमी स्थित कोरिया नेपालमैत्री अस्पतालमा स्वास्थ्य परीक्षणको व्यवस्था मिलाइएको भाषा परीक्षा निर्देशक कृष्णप्रसाद खनालले जानकारी दिनुभयो ।
गत जेठ २६ र २७ गते लिइएको नवौँ चरणको कोरियन भाषा परीक्षामा ७ हजार ९९६ जना उतीर्ण भएका थिए ।