प्रदेश नं २ मा क्यान्सरको उपचार गर्ने पहिलो सेन्टर स्थापना

विष्णु नेपाल
महोत्तरी, १ भदौः क्यान्सर रोगको उपचार सम्बन्धी सबै स्वास्थ्य सेवा महोत्तरीका जनताले अव सर्वसुलभ रुपमा आफ्नो घर आँगनमा नै पाउने भएका छन् ।
विनयतारा फाउण्डेशन अमेरिका, विनयतारा क्यान्सर ट्रष्ट नेपाल र रामगोपाल नगरपालिकाको संयुक्त सहकार्यमा क्यान्सर सेन्टर (अस्पताल) सञ्चालनमा आएपछि नगरवासीले पहिलो पटक विशेषज्ञ सहितको गुणस्तरीय स्वास्थ्य सेवामा पहुँच पाएका हुन् ।
नगरपालिकाका प्रमुख अशोक कुमार मण्डल, उपप्रमुख सीतादेवी साह, वरिष्ठ क्यान्सर रोग एवं शल्यचिकित्सक राकेश साहले हालै सो सेवाको शुभारम्भ गर्नुभयो । अस्पतालले विशेष गरी क्यान्सर रोगका लागि प्रदान गर्ने सेवा गुणस्तरीय हुने बताइएको छ ।
प्रदेश नं २ अन्तर्गत क्यान्सर रोग उपचार गर्ने यो पहिलो सेन्टर मानिन्छ । सिराहा, सप्तरी, धनुषा, महोत्तरी लगायताका जिल्लाका क्यान्सर रोगी उपचार गर्न चितवन अथवा धरान जानुपर्ने बाध्यता कम हुँदै जानेछ । क्यान्सर रोग विशेषज्ञद्वय डा विनय साह र डा राकेशकुमार साहको पहलमा जिल्लाको दुर्गम क्षेत्रमा क्यान्सर सेन्टर सञ्चालनको अगुवाइ गर्नुभएको हो ।
ट्रष्टले अहिले घर भाडामा लिइ अन्तरङ्ग साथै प्रयोगशाला, रेडियोजोली लगायतका सेवा शुरु गरेको छ । शल्यक्रिया, किमोथेरापी जस्ता क्यान्सर रोग सम्बन्धित थप सेवा विस्तार गर्ने जनाइएको छ ।
विशेषज्ञ धेरै तर क्यान्सर बढ्दो
तराई–मधेशमा क्यान्सर रोगका कारण कतिले अकालमा ज्यान गुमाउँदछन् यसको कुनै आधिकारिक तथ्याङ्क कुनै निकाय सित छैन । विशेष गरी सूर्ती, गुट्खा, धूमपान, मदिरापान आदि कारणले हुने विविध प्रकारका क्यान्सर तराई–मधेशमा बढी हुने बताइन्छ ।
महिलाको पाठेघर, स्तनमा हुने क्यान्सर रोगीको मात्रा यही क्षेत्रमा बढी हुने अनुमान छ ।
जनकपुर स्थित निजी अस्पतालमा कार्यरत वरिष्ठ क्यान्सर रोग विशेषज्ञ डा अवधेश कुमार साह तराई–मधेशका जिल्लामा कति क्यान्सर रोगी छन् भनेर हालसम्म कुनै पहिचान नभएको बताउनुहुन्छ । उहाँले कति बिरामी त अन्तिम अवस्थामा आउँने बताउनुभयो । अर्का क्यान्सर रोग विशेषज्ञ डा सन्तोष कुमार पञ्जियार मुखका क्यान्सरको सङ्ख्या तुलनात्मक रुपमा तराई–मधेशमा बढिरहेको बताउनुहुन्छ । नेपाल चिकित्सक सङ्घका अनुसार नेपालमा रहेका क्यान्सर रोग विशेषज्ञ मध्ये करीब ५० प्रतिशत प्रदेश नं २ अन्तर्गतका छन् ।
रासस