१०६ ले गराए मुटुको निःशुल्क परीक्षण

सिन्धुली, २४ भदौः शनिबार सिन्धुलीमा आयोजित निःशुल्क मुटु शिविरमा १०६ जनाले मुटुको स्वास्थ्य परीक्षण गराएका छन् ।
शहीद धर्मभक्त राष्ट्रिय प्रत्यारोपण केन्द्र, लायन्स क्लब अफ सिन्धुली सिटी र सिन्धुली पोलिक्लिनिक धुराबजार द्वारा संयुक्त रुपमा आयोजित उक्त शिविरमा ३० जनाले मुटुको भिडियो एक्सरे र ४५ जनाले इसिजीलगायत स्वास्थ्य परीक्षण गराएका थिए ।
स्वास्थ्य परीक्षण गराएकामध्ये १० जनाको मुटुको शल्यक्रिया गर्नुपर्ने भएकाले उनीहरुको निःशुल्क शल्यक्रियाका लागि शहीद धर्मभक्त राष्ट्रिय प्रत्यारोपण केन्द्रमा सिफारिश गरिएको जनाएको छ ।
शिविरमा निःशुल्क विशेषज्ञ सेवा, मुटुको भिडियो एक्सरेमा ७० प्रतिशत छुट, इसिजीमा ५० प्रतिशत छुट, १५ वर्षमुनिका बालबालिकाको निःशुल्क मुटु रोग उपचार, ज्येष्ठ नागारिकको निःशुल्क उपचार तथा मुटु बाथ रोगको निःशुल्क उपचार गरिएको सिन्धुली पोलिक्लिनिकका डा दिन्जुल कटुवालले जानकारी दिनुभयो ।
मुटुरोगीको सङ्ख्या दिनप्रतिदिन बढ्दै गएको भन्दै खानपानमा विशेष ध्यान दिन परामर्श गरिएको र शिविरमा आएका मध्ये मुटु रोगीको मात्र स्वास्थ्य परीक्षण गरिएको पनि उहाँले बताउनुभयो ।
मुटुरोग विशेषज्ञ डा निशेष बस्नेत, डा किसन कुस्वाहा, डा अच्युत खनाल, डा अमृत केसी, इको तथा इसिजी विशेषज्ञसहित १० जना चिकित्सक टोलीले शिविरमा स्वास्थ्य परीक्षण तथा परामर्श सेवा दिनुभएको थियो ।
नियमित शारीरिक व्यायम, खानपानमा विशेष ध्यान दिए मुटु रोगबाट बच्न सकिने सुझाव चिकित्सकको छ ।
रासस