हेल्थ टुडे,
काठमाडौं : स्वास्थ्य तथा जनसंख्या मन्त्रालयकी सचिव एवं वरिष्ठ स्त्री रोग विशेषज्ञ डा. पुष्पा चौधरीलाई अमेरिकामा ‘ ग्लोबल म्याटरनल भिजनरी अवार्ड ’ प्रदान गरिएको छ । प्रजनन् स्वास्थ्य अधिकारकर्मी चिकित्सकका रुपमा उनले नेपालमा मातृमृत्यु र शिशुमृत्यु दर घटाउन उल्लेख्य भूमिका खेलेको भन्दै अमेरिकाको बोस्टनमा आयोजित प्रसूति स्वास्थ्य सम्बन्धी समारोहमा डा. चौधरी सहित विश्वबाट छनौट भएका १० जनालाई ‘ग्लोबल म्याटरनल भिजनरी अवार्ड ’ प्रदान गरिएको हो । विभिन्न देशका ३ सय ८० मनोनयन मध्ये १० जनालाई अवार्ड प्रदान गरिएको हो । 
डा. चौधरीले लामो समय स्त्री तथा प्रसूति रोग विज्ञका रुपमा राजधानीको प्रसूति गृहमा काम गरेकी थिइन । उनी प्रसूति गृहको निर्देशक समेत भएकी थिइन । प्रसूति गृहमा स्त्री तथा प्रसूति रोग विशेषज्ञका रुपमा कार्यरत रहदा डा. चौधरी दक्षिण एशियाली स्त्री तथा प्रसूति रोग विशेषज्ञ महासंघ र अन्तर्राष्ट्रिय स्त्री तथा प्रसूति रोग विशेषज्ञ समाजको सदस्य भएर काम गरेकी थिइन । उनी नेपाल प्रसूति तथा स्त्री रोग विशेषज्ञ समाज (नेसोग ) को पनि अध्यक्ष भएकी थिइन । डा. चौधरी गत पुष १२ गतेदेखि स्वास्थ्य तथा जनसंख्या मन्त्रालयकी सचिवका रुपमा कार्यरत छिन् ।
Leave a Reply