पहिलोपटक आयोजना गरिएको निःशुल्क स्वास्थ्य शिविरबाट ६१५ जना लाभान्वित

म्याग्दी,१२ फागुन । म्याग्दीको बेनी नगरपालिका–२ ज्यामरुककोटमा पहिलोपटक आयोजना गरिएको विशेषज्ञ चिकित्सकसहितको निःशुल्क स्वास्थ्य शिविरबाट ६१५ जनाले सेवा लिएका छन् । शिविरमा ४१८ महिला र १८७ पुरुषले स्वास्थ्य जाँच गराएका थिए ।

तीमध्ये १२२ स्त्रीरोग, नाक, कान र घाँटीका ८७, फिजिसियन १९९ र हाडजोर्नी तथा नशारोगसम्बन्धी २०७ बिरामीले विशेषज्ञ चिकित्सकबाट उपचार गराएका थिए । एकदिने स्वास्थ्य शिविरमा पोखराका विभिन्न अस्पतालका विशेषज्ञ चिकित्सकले बिरामीको स्वास्थ्य जाँच गरेका थिए । २७ बिरामीलाई भने पोखरामै बोलाएर उपचार गरिने भएको छ ।

शिविरमा गौश्वारा, विमिराबोट, तमाने, भकुण्डे, फापरखेत, खवरा, बगरफाँटलगायत बागलुङ जिल्लाको चनौटे, पन्चासे र मालिकाबाट समेत बिरामी आएका आयोजकले जानकारी दिएका छन् ।

शिविरमा हाडजोर्नी तथा नशारोग विशेषज्ञ डा. भरत खत्री, स्त्रीरोग विशेषज्ञ डा. छममाया पुन, फिजिसियन डा. रोशन श्रेष्ठ, नशारोग विशेषज्ञ डा. राजन शर्मा, हाडजोर्नी विशेषज्ञ डा. सुनिल पहाडी, फिजिसियन डा. किरण तामाङ तथा नाक कान घाँटीका विशेषज्ञ डा. सञ्जय महर्जनको टोलीले बिरामीको स्वास्थ्य जाँच गरेका थिए ।