हेल्थ टुडे,
काठमाडौ,१३ साउनः मुलुकको सबैभन्दा जेठो र ठुलो अस्पताल वीर अस्पतालले आईतबार स्थापनाको १३० औं वार्षिकोत्वस मनाएको छ । तर,दिनप्रति दिन अस्पतालको गरिमा र आम नागरिकको विश्वास घट्दै गएको छ । अस्पतालको सेवाको गुणस्तर घट्दै गएको छ भने अस्पतालमा उपकरण बिग्रने रोग नै लागेको छ ।
अस्पतालमा हरेक वर्ष महँगोमा उपकरण खरिद हुन्छ। तर केही महिनापछि बिग्रन्छ। उपचार गर्न आएका बिरामीलाई चिकित्सक एवं प्राविधिकले नजिकको निजी अस्पतालमा रेफर गर्छन् र कमिसन लिन्छन्। मिर्गौला फेल बिरामीका लागि आवश्यक हेमोडायलाइसिस मेसिन बिग्रँदा सेवा खुम्चिएको छ। मेसिन थोरै र बिरामीको चाप धेरै हुँदा डायलाइसिसका लागि महिनौं पालो पर्खनुपर्ने अवस्था छ। त्यस्तै मुटुका लागि आवश्यक क्याथ ल्याब पनि बिग्रेको छ।
चिकित्सक तथा अस्पतालका कर्मचारीले नियतबश नै उपकरण विगार्ने गरेको नागरिकको गुनाशो नयाँ होइन । नागरीकको गुनाशोलाई थप पुष्टि स्वयम् स्वास्थ्यमन्त्रीले गरेका छन् । अस्पतालको १३०औँ वार्षिकोत्सव समारोहलाई सम्बोधन गर्दै स्वास्थ्यमन्त्री उपेन्द्र यादवले भनेः‘ केही महिनाअघि एमआरआइ मेसिन उद्घाटन गरेर गएको अर्को दिन नै बिग्रियो भन्ने खबर आयो, अर्को दिन बिग्रेको होइन बिगारेका हुन् भनियो ।’ रेडियोलोजीसँग सम्बन्धित विषयमा धेरै गुनासो आएको भन्दै मन्त्री यादवले अस्पतालका कर्मचारीले चलाउन नसके पब्लिक पार्टनसिपमा चलाउने चेतावनी समेत दिए।
मन्त्री यादवले सरकारी अस्पतालमा नियतवश उपकरण बिगारेर बिरामी निजी संस्थामा पठाउनेलाई कारबाहीको दायरामा ल्याउने बताए । उपकरण खरिद गर्नुभन्दा सदुपयोग गर्नु ठूलो कुरा भएको भन्दै मन्त्री यादवले भनेः‘अलोकप्रिय कार्य गर्ने प्रवृत्ति अन्त्य गर्नुपर्छ। मेडिकल इथिक्स र अनुशासन पालना गर्नुपर्छ ।’
त्यसो त, क्यान्सर उपचारका लागि खरिद गरिएको रेडियोथेरापी तथा टोमोथेरापी मेसिन राख्ने ठाउँ अभाव छ। मेसिन सशस्त्र प्रहरीको गोदाममा राखिएको स्वयम् अस्पतालका कर्मचारीले नै जनाएका छन् । अस्पतालका निर्देशक डा.केदारप्रसाद सेन्चुरी मेसिन जडान गर्न बंकर निर्माण भइरहेको बताए ।
अस्पताल उपकरण खरिदमा सरकारी अनुदानमै पूर्ण निर्भर छ। उपकरण मर्मत सम्भारका लागि समेत छुट्टै मर्मतसम्भार कोष व्यवस्था छैन। समयमै मर्मतसम्भार हुन नसक्दा सेवा अवरुद्ध हुने गरेको छ । निम्न आर्थिक अवस्था भएका आम नागरीकको एक मात्र विश्वास र भरोसाको केन्द्रमा रहेको वीर अस्पताल त्यहाँ कार्यरत कर्मचारी र चिकित्सककै कारण दिनप्रतिदिन धरासायी हुदै गएको छ ।
Leave a Reply