कोशी अञ्चल अस्पतालमा अनुगमन,९० प्रतिशत चिकित्सक अनुपस्थित

हेल्थ टुडे,
विराटनगर,१४ साउनः स्वास्थ्य मन्त्रालयको टोलीले कोशी अञ्चल अस्पतालमा आकस्मिक अनुगमन गर्दा अस्पतालको वहिरंग विभागमा ९० प्रतिशत चिकित्सक अनुपस्थित रहेको पाईएको छ । अनुगमनका क्रममा मन्त्रालयका जनस्वास्थ्य अधिकृत कृष्णलाल यादवले अस्पतालको वहिरंग विभागमा ९० प्रतिशत चिकित्सकको उपस्थिती नभएको जानकारी दिए। अधिकृत यादव अनुगमनका क्रममा आफै विरामी बनेर अस्पताल पुगेका थिए ।

पछिल्लो समय सरकारी अस्पतालमा कार्यरत चिकित्सकहरु नीजि अस्पताल तथा क्लिनिकमा केन्द्रित हुन थालेको गुनासोसंगै आफू अनुगमनमा पुगेको अधिकृत उनले जानकारी दिए । बिरामीको बहानामा दिउँसो करिब साढे १ बजे कोशी अञ्चल अस्पताल पुगेका यादवले विभिन्न विभाग पूरै खाली भएको बताए । उनले अस्पतालमा देखिएको लापरवाही तथा चिकित्सकको अनुपस्थिति बारेमा प्रतिवेदन बनाएर मन्त्रालयमा बुझाउने जानकारी दिएका छन् ।

तर, अस्पतालका मेडिकल सुपरिटेन्डेन डा.रोशन पोखरेलले अस्पतालको केही विभागमा दरबन्दी अनुसार चिकित्सकको पदपूर्ति हुन नसक्दा पनि सेवा प्रवाहमा समस्या हुने गरेको दावी गरे । उनले कार्यालय समयमा चिकित्सकहरु काममा नभेटिनु कमजोरी रहेको स्वीकारे । अस्पतालमा सरकार र अस्पताल विकास समितिबाट नियुक्ती पाएका विशेषज्ञसहित ६० जना चिकित्सक कार्यरत छन् । २५ जनालाई अस्पताल विकास समितिले नियुक्ती दिएको छ । यस्तै, नेपाल सरकारले १४ जना करारमा नियुक्त गरेको छ । करारमा रहेका चिकित्सकको अवधि थप गरिएको छैन ।

अस्पतालमा कार्यरत चिकित्सकले बहिरंग विभागमा दैनिक बिहान ९ देखि दिउँसो २ बजेसम्म काम गर्नु पर्ने हुन्छ। तर ११ बजे आउने चिकित्सक १ नबज्दै निजी क्लिनिक पुगिसक्ने गरेको बिरामी र आफन्तहरुको गुनाशो छ । अस्पतालमा दैनिक १ हजार २ सय जना भन्दा बढी बिरामी उपचार र स्वास्थ्य परीक्षणका लागि आउने गरेको अस्पताल प्रशासनले जनाएको छ । अञ्चल अस्पतालमा उचित स्वास्थ्य सेवा नभएको र चिकित्सकले सरकारी सेवा लिएर निजी स्वास्थ्य संस्थामा बढी समय दिने गरेको उजुरी मन्त्रालयमा परेका छन् ।