सप्तरीमा दुईसाता अघिदेखि फैलिएको भाइरल ज्वरोको प्रकोपले जनजीवन अस्तव्यस्त

हेल्थ टुडे,
राजविराज,२४ साउनः सप्तरीमा करिब दुईसाता अघिदेखि फैलिएको भाइरल ज्वरोको प्रकोपले जनजीवन अस्तव्यस्त भएको छ । मौसम परिर्वतनसंगै फैलिएको भाइरल ज्वरोले जिल्ला नै प्रभावित हुन थालेको त्यहाँका स्वास्थ्यकर्मीहरुले बताएका छन् ।

भाइरल ज्वरोले वालवालिका, वृद्धवृद्धा बढी प्रभावित भएका छन् । राजविराजस्थित गजेन्द्रनारायण सिंह अस्पताल प्रशासनले दैनिक १५–२० जना भाइरल ज्वरोका विरामी आउने गरेको जनाएको छ । अहिले औषतमा प्रत्येक घरमा भाइरल ज्वरोले विरामी रहेको अस्पतालका चिकित्सकले अनुमान गरेका छन् ।

अस्पताल बाहेक स्वास्थ्य चौकी, प्राथमिक स्वास्थ्य उपचार केन्द्र लगायत अन्य स्वास्थ्य संस्थामा उपचार गराउनेको संख्या सोही हाराहारीमा रहेको जिल्लामा कार्यरत स्वास्थ्यकर्मीहरुले बताएका छन् । गजेन्द्रनारायण सिंह अस्पतालमा मात्रै उपचारार्थ भर्ना बाहेक दैनिका सञ्चालन हुने ओपीडी सेवामा आधा भन्दा बढी भाइरल ज्वरोकै विरामी आउने गरेको उपचारमा संलग्न चिकित्सकले बताएका छन् ।

अस्पतालमा मात्र दुई सातायता करिब दुई सय भन्दा बढीको उपचार गरी निको भएर घर फर्केको अस्पताल प्रशासनले जनाएको छ ।