डाक्टर कुट्ने इन्सपेक्टरलाई जेल

हेल्थ टुडे

अस्पतालका कार्यरत रहेको अवस्थामा डाक्टरमाथि हातपात गरि गालीगलौज गर्ने इनरुवाका इन्सपेक्टर सन्तोष पोखरेललाई जेल हाल्नु पर्ने नेपाल चिकित्सक संघले सरकारसँग माग गरेको छ । गत कात्तिक ३० गते इनरुवा अस्पतालमा कार्यरत डा. तुसार झामाथि प्रहरी इन्सपेक्टर पोखरेलले हातपात गरि गालीगलौज गरेको आरोप संघको छ । बर्दीमा रहेको प्रहरीले अस्पतालमा काम गरिरहेको चिकित्सकमाथि हातपात गर्नु कानूनी राज्यको उपहास भएकोले त्यस्ता इन्सपेक्टरलाई तत्काल जेल चलान गर्नु पर्ने संघका महासचिव डा. लोचन कार्कीले जारी गरेको विज्ञप्तिमा उल्लेख गरिएको छ ।

संघले गृह मन्त्रालय र प्रहरी प्रधान कार्यालयमा घटनाका दोषी प्रहरी इन्सपेक्टरलाई तत्काल कारवाही गर्न माग गर्दै छलफल गरेको र कारवाही गर्ने प्रतिबद्घता जनाइसकेकोले दोषीलाई तत्काल कारवाही हुने आशा व्यक्त गरेको छ । संघले चिकित्सक माथि बढ्दो आक्रमणका घटना कम गरि भयरहित वातावरणमा चिकित्सकले विरामीको उपचार गर्न पाउने वातावरण बनाउन सरकारले ‘ जेल वीदआउट बेल’ अविलम्ब लागु गर्नु पर्ने माग गर्दै आइरहेको छ । प्रहरी इन्सपेक्टर र चिकित्सकबिचको विवादका कारण इनरुवा अस्पतालमा तोडफोड हुनुका साथै सेवा समेत अवरुद्घ भएको थियो ।