अख्यितारको कारवाही पत्र स्वास्थ्यबाट गायव

अख्यितार दुरुपयोग अनुसन्धान आयोगले स्वास्थ्य मन्त्रालयकी निमित्त सचिव डा. पुष्पा चौधरी लगायत ६ जना कर्मचारीलाई कारवाही गर्न पठाएको पत्र स्वास्थ्य मन्त्रालयमा गायव बनाएको पाइएको छ । प्रसूति गृहकी तत्कालिन निर्देशक डा. चौधरीसहित ६ जनालाई कारवाही गर्न अख्तियारले असारमै पठाएको पत्र मन्त्रालयमा दर्ता नै नभएको खुलासा भएको हो ।

अख्तियारका अनुसन्धान अधिकृत शंकरबहादुर केसीले हस्ताक्षर गरेको चलानी नम्बर २३८९ को अत्यन्त जरुरी गोप्यपत्र स्वास्थ्य मन्त्रालयमा दर्ता नै नभएको मन्त्रालयका अधिकारीले बताएका छन् । तत्कालिन स्वास्थ्य सचिव डा. किरण रेग्मीका पालामा डा. चौधरीलाई भ्रष्टाचार गरेको गठर गर्दै कारवाही गर्न पत्र पठाएको थियो । प्रसूति गृहको निर्देशक हुदा चौधरीले औषधिजन्य समान, बिजुली र उपकरण लगायतका समानको आपूर्तिमा भ्रष्टाचार गरेको ठहर गर्दै अख्तियारले २ असारमा कारवाहीको सिफारिस गरेको भएपनि सो पत्र मन्त्रालयमा दर्ता गरिएको छैन । सो पत्र अहिलेसम्म किन दर्ता भएन भन्ने विषयमा सबै पक्ष मौन छन् । गत हप्तामात्र सेवा निवृत भएकी पूर्व स्वास्थ्य सचिव डा. रेग्मी उक्त पत्र आफू सचिव हुन्जेलसम्म आफ्नो हात नपरेको बताएकी छिन् । मन्त्रालय उच्च स्रोतका अनुसार डा. चौधरीले नै आफूलाई कारवाही हुने डरले ठूलो आर्थिक चलखेल गरि सो पत्र दर्ता नगर्न कर्मचारीलाई खटाएको दाबी गरेको छ । कारवाही गरिए आफू सचिवको उम्मेदवार समेत हुन नसक्ने भएकाले चौधरीकै मिलेमतोमा यो भएको हुन सक्ने स्रोतको दावी छ ।

कारवाहीमा परेकी उनै डा. चौधरी अहिले सचिव बन्ने दौडमा छिन् । डा.चौधरी यो भन्दा पहिले पनि विवादित चिकित्सकका रुपमा चिनिन्छिन् । उनी माथि दोहोरो सुविधा लिएको, नागरिकतामा उमेर सच्याइएको, राजधानी बाहिर कहिल्यै नगएको, आर्थिच चलखेल गरेर महानिर्देशक बनेको जस्ता बिषयमा पनि उनी माथि अख्तियारमा उजुरी परेको थियो ।  अख्तियारले पठाएको सिफारिस पत्रमा विभिन्न विद्युतिय समान खरिद गर्दा सार्वजनिक खरिद ऐन, नियमावली बिपरित डा. पुष्पाले सोझै खरिद गरेको, खरिद गरेका समानको गुणस्तर परिक्षण समेत नगराई भुक्तानीका लागि स्विकृत गरेको, फ्रिज भएको करिव दुई करोड रकम फ्रि नहुने खातामा सार्न स्वीकृत दिएको साथै चौधरीले जानाजानी कुनै निर्णय वा आदेश गर्दा बाध्यात्मक रुपले अपनाउनु पर्ने कार्यविधिको पालना नगरेको ठहर गरेको छ । अख्तियारले चौधरी सहित प्रसूति गृहका प्रशासन प्मुख अमरनाथ अमात्य, बरिष्ठ लेखा अधिकृत चन्द्रबहादुर गुरुङ,तत्कालिन लेखा अधिकृत अमित पौडेल, तत्कालिन साखा अधिकृत रानु थापा र स्टोकिपर लिला केसीलाई आवश्यक कारवाही गरि सोको जानकारी आयोललाई समेत दिन भनिएको छ । ( आजको सौर्य दैनिकबाट )