प्रदेश स्वास्थ्य मन्त्रालयमा माग १४०, इच्छुक ६००

हेल्थ टुडे
काठमाडौं, २१ पुष : देशका ७ वटै प्रदेशमा रहने स्वास्थ्य मन्त्रालयमा सरुवा भएर जान करिव ६ सय कर्मचारीले स्वास्थ्य मन्त्रालयमा निवेदन दिएका छन ।
स्वास्थ्य मन्त्रालयले प्रदेशमा जान चाहने इच्छुक कर्मचारीलाई ३ दिनभित्र निवेदन पेस गर्न मंगलबार सार्वजनिक सूचना निकालेको थियो । ३ दिनको समयसिमा भित्र करिब ६ सय जना कर्मचारीले निवेदन दिएको स्वास्थ्य मन्त्रालयका उपसचिव बाबुराम खनालले बताए । उनले भने, ‘ करिव ६ सय जना कर्मचारीको निवेदन परेको छ । मापदण्डका आधारमा छनौटको काम अगाडि बढाउछौ । ’
मन्त्रालयले ७ वटा प्रदेशमा रहने स्वास्थ्य, शिक्षा तथा समाजिक विकास मन्त्रालयका लागि १ सय ४० जना कर्मचारी खटाउन लागेको छ ।
उपचसचिव खनालका अनुसार चौथोदेखि ११औं तहका लागि आवश्यक १ सय ४० पदका लागि आवेदन मागिएको हो । छनोटमा परेका कर्मचारीको विवरण सामान्य प्रशासन मन्त्रालय पठाइने जानकारी खनालले दिए ।
त्यसैगरि सामान्यले ७ प्रदेशमध्ये ४ प्रदेशमा स्वास्थ्य क्षेत्रबाट सचिव राखिने भएकाले स्वास्थ्य मन्त्रालयबाट ४ जनाको नाम सिफारिस गर्न पनि समान्यले भनेको थियो । सचिव पदका लागि पनि करिव एक दर्जनको आवेदन परेको छ । ती मध्ये मापदण्ड पुगेका वरिष्ठतम ४ जनालाई सिफारिस गरिने स्वास्थ्य मन्त्रालय स्रोतले जनाएको छ ।
समान्यले तत्कालका लागि ११औं तहका ७ जना, दसौं र नवौं तहका ३५ जना, आठौं तहका ६३ र छैटौं, पाँचौं र चौथो तहका ३५ जना गरी कुल १ सय ४० जना कर्मचारीको नाम पठाउन स्वास्थ्य मन्त्रालयलाई पत्र पठाएको थियो । पत्र प्राप्त भएपछि स्वास्थ्य मन्त्रालयले कर्मचारी समायोजनको कामलाई तिव्र रुपमा अगाडि बढाएको हो ।