राजधानीका चोक चोकमा दात माझ्न सिकाइदै

हेल्थ टुडे,

काठमाडौं, ६ चैत : विश्व मुख स्वास्थ्य दिवसको अवसरमा आज  राजधानीका प्रमुख चोकहरुमा सही तरिकाले दात माझ्ने कला सिकाइदै छ । नेपाल डेन्टल साइन्स हाइजेनिस्ट एसोसिएसनको आयोजनामा राजधानीका प्रमुख चोकहरु चावहिल, सुकेधारा, धुम्बाराही, चक्रपथ, बसुन्धरा, गंगवु, बानेश्वर, कोटेश्वर सहित २३ वटा चोकमा डेन्टल हाइजेनिस्टहरुले दात माझ्ने सही तरिका सिकाउदै छन् । सही तरिकाले दात माझ्न नजान्दा दातहरु विग्रने गरेको पाइएको छ ।

मुख स्वास्थ्यलाई बेवास्ता गर्ने प्रवृति हटाएर मुख स्वास्थ्यका बिषयमा जनचेतना बिस्तार गर्न सही किसिमले दात माझ्न सिकाउन र मुख स्वास्थ्यका बिषयमा चेतना बिस्तार गर्न अभियान सञ्चालन गरिएको नेपाल डेन्टल साइन्स हाइजेनिस्ट एसोसिएसनका अध्यक्ष माइकल देवकोटाले बताए । एसोसिएसनले आजै मुख स्वास्थ्यका बिषयमा चावहिलको ए वान पार्टी प्यालेसमा स्वास्थ्य मन्त्रालयका अधिकारी, विज्ञहरु र सम्बन्धित सरोकारवालाहरुबिच बृहत छलफल गर्ने जनाएको छ ।