ज्येष्ठ नागरिकलाई भत्ता र निःशुल्क स्वास्थ्य परीक्षण शुरु

काठमाडौँ, २१ जेठः काठमाडौँ महानगरपालिकाले आइतबार देखि पुनः ज्येष्ठ नागरिकलाई माहानगर भत्ता र निःशुल्क स्वास्थ्य परीक्षण कार्यक्रम शुरु गरेको छ । कामपाले आज काठमाडौँमा आयोजना गरेको कार्यक्रममा कार्यालयमा आउन सक्नेलाई आफ्नै कार्यालयमा र आउन नसक्नेलाई घरमै गएर स्वास्थ्य परीक्षण गर्ने गरी काम शुरु गरेको हो । झन्डै एक वर्षअघि जनप्रतिनिधिको आगमनसँगै कामपाले ८८ वर्ष माथिका ज्येष्ठ नागरिकलाई मात्र उक्त सेवा दिएकोमा यस वर्षदेखि सेवामा विस्तार गरेको हो ।
महानगरले ७५ वर्ष उमेर पूरा भएका महिला र ८० वर्ष उमेर पूरा भएका पुरुषका लागि निःशुल्क स्वास्थ्य परीक्षण सेवा र महानगर भत्तावापत् वार्षिक रु १२ हजार प्रदान गरिने पनि महानगरका प्रमुख विद्यासुन्दर शाक्यले जानकारी दिनुभयो ।
हाल महानगरमा उक्त उमेर समूहका करिब छ हजार ९२२ नागरिक रहेको प्राररम्भिक अनुमान गरिएको छ । कार्यक्रममा सहभागी ज्येष्ठ नगरिकको स्वास्थ्य परीक्षण गर्दै चिकित्सा विज्ञान तथा राष्ट्रिय प्रतिष्ठानका उपकुलपति प्रा डा गणेशबहादुर गुरुङले स्वास्थ्य परीक्षण सेवाको शुभारम्भ गर्नुभएको हो ।
काठमाडौँ महानगरमा बसोबास गर्ने कुनै पनि ज्येष्ठ नागरिकले रकम अभावमा रोग लुकाएर बस्नु नपरोस् भनेर ज्येष्ठ नागरिकको घरमै उपचार गर्ने व्यवस्था गरिएको महानगरको जनस्वास्थ्य महाशाखा प्रमुख हरिकुमार श्रेष्ठले बताउनुभयो ।
बिहान १० देखि अपराह्न ५ बजेसम्म निःशुल्क सेवा उपलब्ध गराइनेछ । ल्याव परीक्षण, निःशुल्क औषधि लगायतको सेवा उपलब्ध गराइने छ । ज्येष्ठ नागरिकको घरमा जाने डाक्टरलाई मेडिकल उपकरण सहितको झोला, बिरामी जाँचको पूर्जा दिएर पठाइने महानगरको योजना छ । स्वास्थ्यकर्मीको टोलीमा एक चिकित्सक सहित चार जना हुनेछन् । स्वास्थ्य परीक्षणका लागि दैनिक २० वटा समूह परिचालित हुनेछ ।
रासस