स्वास्थ्य क्षेत्रमा सकारात्मक विमर्श नै आजको आवश्यकता

हेल्थ टुडे,
चितवन, असोज ७ः नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ’प्रचण्ड’ले स्वास्थ्य क्षेत्रमा सकारात्मक विमर्श नै आजको आवश्यकता रहेको बताउनुभएको छ ।
चितवनको भरतपुरमा आइतबार आयोजित आठौं हेल्थ अवार्ड २०७५ तथा नेपाल लाइभको पहिलो वार्षिकोत्सव कार्यक्रममा बोल्दै प्रचण्डले हेल्प पब्लिकेशन प्रालिले स्वास्थ्य सेवामा विमर्शको सुरुवात गरेकोमा धन्यवाद दिनुभयो ।
स्वास्थ्य क्षेत्रलाई सुदृढ गर्ने, निरन्तरता दिने र यो क्षेत्रमा भिजन तयार पार्नको लागि केन्द्रित हुनु आजको आवश्यकता रहेको प्रचण्डले औलाउनुभयो ।
उहाँले नेपालमा जडिबुटीको प्रचुर सम्भावना भएकाले त्यसलाई सदुपयोग गर्नुपर्ने बताउनुभएको छ । आफू भारत भ्रमणमा गएका बेला रामदेवले औषधि बनाउनका लागि प्रयोग हुने जडिबुटी नेपालबाट आएको भनेर बताएको स्मरण समेत गर्नुभयो ।
हरेक क्षेत्रमा अराजकता रहेको भन्दै प्रचण्डले त्यसको अन्त्य गर्नुपर्नेमा जोड दिनुभयो । हामीसंग सुशासनको अभाव छ, अराजकताको समस्या छ भन्दै प्रचण्डले त्यसको अन्त्य भएपछि नेपालले चाँडै प्रगति गर्न सक्ने बताउनुभयो । कार्यक्रममा स्वास्थ्य क्षेत्रका विभिन्न विधामा योगदान र्पुयाएका ७ जनालाई हेल्थ अवार्ड प्रदान गरिएको थियो ।