गण्डकी मेडिकल कलेजः४६ दिनपछि ताला खुलेपनि कलेज र अस्पताल सञ्चालन अझै अनिश्चित

हेल्थ टुडे,
पोखरा,३ चैतः सरकारले तोकेभन्दा बढी शुल्क उठाएको विरोधमा मेडिकल कलेजका विद्यार्थीले गण्डकी मेडिकल कलेजमा लगाएको ताला ४६ दिनपछि खोलेका छन् । उच्च अदालत पोखराले कलेज सञ्चालकलाई पक्राउ गरी अनुसन्धान गर्न बाटो खोलिदिएपछि न्याय पाउने विश्वासमा विद्यार्थी आफैले ४६ दिन अघि कलेज र अस्पतालमा लगाएको ताला खोलेका हुन् ।

ताला खुले पनि सञ्चालकहरु फरार रहेकाले कलेज र अस्पताल सञ्चालन भने अनिश्चित छ । विद्यार्थीहरुले भने आफुहरुको आन्दोलन जारी रहेको भन्दै ‘न्यायालयको आदेशलाई सम्मान गर्दै न्याय पाउने विश्वासमा ताला खोलेको जिकिर गरेका छन् । गैरकानुनी शुल्कको विरोध गरेर आन्दोलनमा उत्रिएका विद्यार्थीलाई देखाईदिने भन्दै कलेज प्रशासनले धम्की दिँदै आएको आन्दोलनरत विद्यार्थीहरुको दावी छ ।

कलेजका अध्यक्ष खुमा अर्याल, प्रिन्सिपल रवीन्द्र श्रेष्ठलगायत फरार छन् भने दोस्रो तहका व्यवस्थापक कलेज र अस्पताल जिम्मा लिएर सञ्चालन गर्न तयार छैनन् । बिहीबार अदालतको आदेश आएपछि शुक्रबारै ताला खोल्न विद्यार्थी तयार भए पनि कलेज प्रशासनसँग सम्पर्क नभएकै कारण धकेलिएको थियो । शनिबार जिल्ला प्रशासनको समन्वयमा ताला खोलिएको थियो ।

विद्यार्थीले अस्पतालको ओपिडीसहित टिकट काउन्टरमा लगाएको ताला खोलेको जिल्ला प्रहरी कार्यालय कास्कीले जनाएको छ । प्रशासनिक र लजिस्टिक भवनको ताला भने कलेजका तर्फबाट जिम्मा लिने व्यक्ति नभएकाले नखोलिएको विद्यार्थीहरुले जनाएका छन् ।

सरकारले काठमाडौंबाहिरका मेडिकल कलेजलाई एमबिबिएसका विद्यार्थीसँग ४२ लाख ४५ हजारभन्दा बढी नउठाउन नियम तोके पनि गण्डकी मेडिकल कलेजले विनारसिद १० देखि १५ लाखसम्म बढी असुलेपछि विरोधमा विद्यार्थी आन्दोलित भएका थिए ।