मेडिकल कलेजलाई कारबाही गर्ने इच्छा भीसी सरमा देखिँदैन, एक वर्षदेखि अनुगमन निर्देशनालयको प्रतिवेदन लुकाएर राख्नुभएको छ । – सुधा त्रिपाठी, रेक्टर त्रिवि
हेल्थ टुडे,
काठमाडौ,७ चैतः शैक्षिक शुल्कका नाममा लाखौं रुपैयाँ असुलेर विद्यार्थी–अभिभावकलाई ठगी गर्ने मेडिकल कलेजलाई त्रिभुवन विश्वविद्यालयकै उपकुलपति तीर्थराज खनियाँले संरक्षण दिने गरेका छन् । पटक–पटक विद्यार्थी–अभिभावकले उजुरी गर्दा पनि ती कलेजविरुद्ध कारबाही गर्न उनले चासो नदेखाएका हुन् । जसका कारण मेडिकल कलेजले विद्यार्थीबाट असुल्ने रकमको दर बढाउँदै लैजाने मौका पाएका छन् । विद्यार्थीको उजुरी र त्रिविकै अनुगमन निर्देशनालयले गरेको छानबिनमा अघिल्लो शैक्षिक सत्रमै मेडिकल कलेजले विद्यार्थीबाट लाखौं अवैध शुल्क उठाउँदै आएको पाइएको थियो ।
उजुरी र छानबिन समितिको प्रतिवेदनलाई कार्यकारी परिषद्मा लगेर कारबाही प्रक्रिया अघि बढाउन खनियाँले आनाकानी गरेका हुन् । यसमा रजिस्ट्रार डिल्लीराम उप्रेतीले पनि साथ दिएका छन् । डिन कार्यालयलगायत त्रिविका विभिन्न निकायमा आएका उजुरी र गुनासा कार्यकारी परिषद् बैठकमा लैजाने र त्यहाँबाट निर्णय गरेर कारबाही गर्ने प्रावधान छ । निर्देशनालयको छानबिन प्रतिवेदन पनि परिषद्बाटै निर्णय गराएर कार्यान्वयनमा लगिन्छ ।
उपकुलपति खनियाँले भने निर्देशनालयको विज्ञ छानबिन टोलीले तयार पारेको प्रतिवेदन लुकाएर अवैध धन्दा चलाउने मेडिकल कलेजहरूलाई संरक्षण गर्दै आएका हुन् । डिन कार्यालयले पत्राचार गर्दासमेत मेडिकल कलेजलाई कारबाही गर्न उपकुलपतिले चासो नदिएको स्रोतले जनायो । चिकित्सा शिक्षा अध्ययन संस्थान डिन कार्यालय स्रोत भन्छ,‘कारबाही गर्न नेतृत्व गर्ने व्यक्ति नै मौन बसेपछि केही गर्न सकिएन, मेडिकल कलेजको अवैध धन्दा झन्झन् मौलाउँदै गएको छ ।’
डिन कार्यालय र निर्देशनालय ललितपुरको किस्ट, भरतपुरको चितवन, भैरहवाको युनिभर्सल, वीरगन्जको नेसनल र पोखराको गण्डकी मेडिकल कलेजले अतिरिक्त शुल्क असुल्ने गरेको विषयमा गतवर्ष नै जानकार थिए । सोही आधारमा डिन कार्यालयले छानबिनका लागि निर्देशनालयलाई आग्रह गर्यो । निर्देशनालयले २–२ जनाको विज्ञ टोली बनाएर अनुगमनमा खटायो । छानबिन प्रतिवेदन गत वर्ष फागुनमै कार्यकारी परिषद्मा पुगेको छ । खनियाँ भने छानबिन नभएको र मेडिकल कलेजले अवैध शुल्क लिने जानकारी त्रिविलाई नभएको तर्क गर्छन् ।
कार्यकारी परिषद्मा पुगेको प्रतिवेदन अनुमोदन गराएर कारबाही गर्न उपकुलपतिले बेवास्ता गरेको रेक्टर सुधा त्रिपाठीले बताइन् ।‘मेडिकल कलेजका विषयमा कारबाही गर्ने इच्छा भीसी सर (उपकुलपति) मा देखिँदैन,’ उनले भनिन्,‘एक वर्षदेखि अनुगमन निर्देशनालयको प्रतिवेदन लुकाएर राख्नुभएको छ ।’ त्रिपाठी पछिल्लो समय कारबाही गर्नुपर्ने पक्षमा उभिए पनि उपकुलपति खनियाँ र रजिस्ट्रार उप्रेती भने मेडिकल कलेजले अतिरिक्त रकम लिएकोबारे जानकारी नभएको भन्दै आलटाल गरिरहेका छन् । डिन जगदीश अग्रवालले पनि कार्यकारी परिषद्बाट निर्णय नहुँदा मेडिकल कलेजमाथि कारबाही गर्न नसकिएको जनाए ।
विद्यार्थी र अभिभावकको गुनासो आधारमा गत वर्षदेखि बढी शुल्क लिने कलेजबारे त्रिविलाई जानकारी गराएको उनले बताए । मनोमानी शुल्क लिने मेडिकल कलेजलाई कारबाही गर्न त्रिविले चासो नदेखाउँदा विद्यार्थी निरन्तर ठगिने गरेको अधिवक्ता ओमप्रकाश अर्यालले बताए । कलेज सञ्चालक र उपकुलपतिको मिलेमतोका कारण बदमासी गर्ने मेडिकल कलेजहरू कारबाहीको दायरामा आउन नसकेको उनको भनाइ छ ।
मेडिकल कलेजहरूलाई कारबाही नगरेको भन्दै सत्तारूढ नेकपाकै विद्यार्थी संगठनले उपकुलपति र डिन कार्यालयमा तालाबन्दी गरेका छन् । अनेरास्ववियु र अखिल क्रान्तिकारीले विद्यार्थीलाई ठगी गर्ने कलेजका सञ्चालकहरूलाई कारबाही माग गरेका हुन् । विद्यार्थीसँग तोकिएभन्दा बढी लिएको शुल्क फिर्ता गराई कलेजलाई सम्बन्धन खारेजीसम्मको कारबाही गर्नुपर्ने उनीहरूको माग छ ।(कान्तिपुर दैनिकबाट)
Leave a Reply