हेल्थ टुडे,
कञ्चनपुर,१० बैशाखः कञ्चनपुर स्थिति महाकाली अञ्चल अस्पतालमा औषधिको अभाव भएको छ । अञ्चल अस्पतालबाट विपन्न र असहायलाई वितरण गरिने निःशुल्क औषधिको चरम अभाव भएको हो । औषधि अभाव हुँदा दैनिकजसो बिरामी रित्तोहात फर्किन बाध्य छन् ।
बजेट अभावका कारण औषधि खरीदमा समस्या भएपछि लक्षित वर्गलाई औषधि वितरण बन्द गरिएको महाकाली अञ्चल अस्पताल प्रशासनले जनाएको छ । अञ्चल अस्पतालभित्र रहेको सामाजिक सेवा केन्द्र एकाइमार्फत् गरीब, असहाय, अपाङ्गता भएका व्यक्ति, ज्येष्ठ नागरिक, महिला स्वास्थ्य स्वयंसेविका, शहीद परिवारलगायतलाई निःशुल्क औषधि दिँदै आइरहेको थियो । चार दिनअघि अस्पतालले सूचना जारी गर्दै बजेट अभावका कारण औषधि र आंशिक छुट दिन नसक्ने जानकारी दिएको छ ।
महाकाली अञ्चल अस्पताल प्रशासनले औषधिका लागि सङ्घीय सरकारबाट चालू आर्थिक वर्षमा रु तीन लाखमात्रै आएको जनाएको छ । औषधि अभाव भएपछि औषधि उपलब्ध गराउनका लागि सुदूरपश्चिम प्रदेश सरकारमा पहल भईरहेको अस्पतालले जनाएको छ ।
अस्पतालले औषधि आएपछि लक्षित वर्गलाई पुनः निशुल्क औषधि वितरण शुरु हुने जनाएको छ । औषधि पाउन छाडेपछि दैनिक २० देखि ३० जना लक्षित वर्गका बिरामी मारमा परिरहेका छन् ।
Leave a Reply