स्वास्थ्य अनुसन्धानका आधारमा स्वास्थ्य नीति बन्नु पर्छ  : यादव

हेल्थ टुडे,

काठमाडौं, २८ चैत : स्वास्थ्य तथा जनसंख्या राज्यमन्त्री डा. सुरेन्द्रप्रसाद यादवले स्वास्थ्य अनुसन्धानका आधारमा स्वास्थ्य नीति बन्नु पर्ने बताएका छन । अनुसन्धानबाट प्राप्त प्रमाणका आधारमा बन्ने नीतिले मात्र वास्तविक जनताको स्वास्थ्य समस्या हल गर्न सक्ने उनको दाबी छ ।  नेपाल स्वास्थ्य अनुसन्धान परिषद्ले राजधानीमा आयोजना गरेको स्वास्थ्य तथा जनसंख्या वैज्ञानिकहरुको पाँचौ शिखर सम्मेलन उद्घाटन गर्दै राज्यमन्त्री यादवले स्वास्थ्य क्षेत्रमा अझै बढी अनुसन्धान हुनुपर्नेमा जोड दिए ।उनले भने, ‘आधारिक र तथ्यपूर्ण अनुसन्धानले सरकारलाई  नीति, योजना र कार्यक्रम बनाउन सहज हुन्छ । अनुसन्धानका आधारमा बनाएको नीति जनस्वास्थ्यका लागि बलियो आधारस्तम्भ हो ।’ स्वास्थ्य अनुसन्धान परिषद्ले अनुसन्धानमा गरिरहेको प्रयास सकारात्मक रहेको बताउदै राज्यमन्त्री यादवले परिषद्लाई सरकारको पूर्णसहयोग रहने बताए।

स्वास्थ्य सचिव डा पुष्पा चौधरीले जनस्वास्थ्य ऐन र  प्रजनन स्वास्थ्य ऐनको सफल कार्यन्वयनले स्वाथ्यका अधिकांश समस्या समाधान गर्ने दावी गर्दै स्वास्थ्य विमालाई देशभरि नै लागु गर्ने तयारी भइरहेको जानकारी दिइन । नेपाल स्वास्थ्य अनुसन्धान परिषद्का कार्यकारी अध्यक्ष प्रा.डा अन्जनीकुमार झाले देशको कुनाकप्चाका स्वास्थ्य समस्या र समाधानका बिषयमा सम्मेलनमा व्यापक छलफल हुने भएकाले सम्मेलनले हरेक वर्ष थप उचाई लिइरहेको बताए । सम्मेलनमा परिषद्का उपाध्यक्ष डा. भोजराज अधिकारी, वरिष्ठ मुटुरोग विज्ञ डा. मृगेन्द्रराज पाण्डे, प्रमुख विशेषज्ञ डा. शुशिलनाथ प्याकुरेल लगायतले स्वास्थ्य अनुसन्धानको आवश्यकतामाथि जोड दिएका थिए ।‘संघीय प्रणालीमा समता र विकासका लागि अनुसन्धान’ नारा दिइएको सम्मलेन भोलि शुक्रबारसम्म चल्नेछ। सम्मेलनमा स्वास्थ्यका विविधि विषयमा १ सय ३७ अनुसन्धानात्मक कार्यपत्र प्रस्तुत गरिने छ। जसमध्ये ३३ वटाको मौखिक प्रस्तुतीकरण र १ सय ४ वटाको पोस्टर प्रस्तुतीकरण भइरहेको परिषद्ले जनाएको छ। सम्मेलनमा प्रस्तुत गरिएका मध्येबाट ७ वटा विधामा उत्कृष्ट वैज्ञानिकलाई सम्मानित गरिने परिषद्ले जनाएको छ। सम्मेलनमा एक हजार व्यक्तिले सहभागिता जनाएका छन्।