जिल्ला अस्पताल सिरहामा औषधिको चरम अभाव

हेल्थ टुडे,
सिरहा,५ बैशाखः जिल्ला अस्पताल सिरहामा औषधिको चरम अभाव भएको छ । विगत एक वर्षदेखि औषधिको आपूर्ति हुन नसक्दा जिल्ला अस्पतालमा औषधिको चरम अभाव भएको हो । कूल ५० श्ययाको उक्त अस्पतालमा हाल कुनै पनि औषधि नरहेको अस्पताल प्रशासनले जनाएको छ ।

जिल्ला अस्पतालबाट ७० प्रकारको औषधि निःशुल्क वितरण गर्ने व्यवस्था छ । निःशुल्क वितरण गर्ने भनिए पनि अस्पतालमा अहिले कुनै पनि प्रकारका औषधि छैनन् । अस्पतालमा आवश्यक औषधि नहुँदा बिरामी निजी क्लिनिकबाट चर्को मूल्यमा औषधि खरीद गर्न बाध्य छन् ।

औषधिको अभाव बारे पटक–पटक सम्बन्धित निकायमा जानकारी गराउँदा आपूर्ति नभएको अस्पतालको गुनासो छ । सङ्घीय व्यवस्थाअनुसार नगरपालिका कार्यालयले औषधि खरीद गरी अस्पताललाई उपलब्ध गराउनुपर्ने भए पनि नगरपालिकाले बेवास्ता गर्दै आएको छ ।