उपचारको व्यवस्था हुँदाहुँदै बिरामी बाहिर पठाउने अस्पताललाई ५ लाख जरिवाना

हेल्थ टुडे,
वीरगञ्ज,२२ जेठः प्रदेश २ सरकारले आफूले उपचार गर्न सक्ने अस्पतालले बिरामी अन्यत्र पठाएमा पाँच लाख रुपैयाँसम्म जरिवाना हुने कानुन ल्याउने भएको छ । प्रदेश २ का सामाजिक विकासमन्त्री नवलकिशोर साहले प्रदेशसभा बैठकमा पेश गरेको सो विधेयकमा यस सम्बन्धी व्यवस्था गरिएको जानकारी दिएका छन् ।

सो विधेयकमा स्वास्थ्य संस्थामा उपचार गर्न आउने बिरामीलाई उपचारको व्यवस्था हुँदाहुँदै अर्को अस्पतालमा उपचारका लागि पठाएमा २५ हजारदेखि पाँच लाख रुपैयाँसम्म जरिवानाको व्यवस्था गरेको छ । यस्तै, अनुमति नलिई स्वास्थ्य संस्था सञ्चालन गरेको पाइएमा एक लाख रुपैयाँसम्म जरिवाना र सो संस्था बन्द गराउने व्यवस्थासमेत विधेयकमा गरेको छ ।

यसैगरी विधेयकमा दर्ता नगरी स्वास्थ्य सेवा प्रदान गर्ने चिकित्सक वा व्यक्तिलाई २५ हजारदेखि एक लाख रुपैयाँसम्म जरिवाना गर्ने व्यवस्था गरेको छ । विधेयकले ग्रामीण क्षेत्रमा धामी, झाँक्री आफू रोगको उपचार गर्ने व्यक्ति भएको भनेर बिरामीलाई अल्झाएर राख्ने र अन्तिम समयमा अस्पताल पुर्‍याउँदा बिरामीको मृत्यु हुने भएकाले त्यस्ता धामी, झाँक्रीलाई कानुनको दायरामा ल्याउनसमेत व्यवस्था गरि विधेयक ल्याएको छ ।