हेल्थ टुडे,
काठमाडौ,२३ साउनः काठमाडौ मिनभवनमा रहेको सिभिल अस्पतालमा आजदेखि अनलाइन टिकट काट्न पाउने व्यवस्था गरेको छ । बिहीबार (आज) बिहान अनलाइन टिकट प्रणालीको सुरुवात गरिने अस्पतालका कार्यकारी निर्देशक डा.दीर्घराज आरसीले जानकारी दिए । पहिलो चरण परीक्षणका रुपमा यो व्यवस्था गर्न लागिएको उनले जानकारी दिए ।
अनलाइनबाट टिकट लिने व्यवस्थाको सुरुवातसंगै घन्टौ लाम बसेर टिकट काट्नु पर्ने बाध्यताको अन्त्य हुने अपेक्षा गरिएको छ ।
कार्यकारी निर्देशक आरसीले भनेः‘ अब विरामीले लाइनको लागि ४ ठाउँ बस्नु पर्ने बाध्यता हुदैन, ३–४ घण्टा लाइनमा पनि बस्नु पर्दैन ।’
अब विरामी र आफन्तले घरमै बसेर मोबाइलबाट समेत टिकट काट्न सक्नेछन्। टिकट काट्नका लागि बिरामीले अस्पतालमा समेत पुग्न नपर्ने सुबिधा भएको छ। गाउँबाट आउने मान्छेले अनलाइनबाट टिकट काट्न नसक्ने भएकाले उनीहरुलाई पूरानै तरिकाबाट टिकट काट्ने व्यवस्था गरिएको छ ।
सिभिलले प्रभु पे मोबाइल वालेटमार्फत ओपिडी टिकट काट्ने व्यवस्था गरेको हो। सिभिलमा दैनिक करिब १ हजार विरामी उपचारको लागि आउने गरेको अस्पताल प्रशासनले जनाएको छ ।
Leave a Reply