बिरामीको अत्यधिक चाप बढेपछि हेटौँडा अस्पतालको सेवा नै प्रभावित

हेल्थ टुडे,
हेटौँडा,११ असोजः पछिल्ला केहिदिनयता हेटौँडा अस्पतालमा बिरामीको चाप बढ्दै गएको छ । डेङ्गु, स्क्रबटाइफस, भाइरलज्वरो जस्ता समस्याले हेटौंडा अस्पतालमा उपचारका लागि आउने बिरामीको संख्या बढ्दै गएको हो । बिरामीको चाप अस्पतालमा अत्यधिक बढ्दा सेवा प्रभावमा समस्या भइरहेको अस्पताल प्रशासनले जनाएको छ ।

अस्पतालका अनुसार तीन सय बिरामीको उपचार क्षमता रहेको उक्त अस्पतालमा ५०० देखी ७०० सम्म उपचारका लागि बिरामी आउने गरेका छन् । उपचारका लागि अस्पताल आउने बिरामीको चाप अत्यधिक बढेपछि उनीहरु श्यया कुरेर बस्न बाध्य भएका छन् । विगत दुई वर्षदेखि बीमा कार्यक्रम लागू भएकाले उपचार गर्नेहरूको सङ्ख्या बढेको र वर्षायाम शुरू भएदेखि डेङ्गु र स्क्रबटाइफसका बिरामी बढेपनि अस्पतालको क्षमता बढाउन नसकिएकाले श्यया अभावको समस्या विकराल बन्दै गएको अस्पतालले जनाएको छ ।

श्यया अभावकै कारण चिकित्सकले भर्ना गर्नुपर्छ भनेका बिरामीहरूमध्ये पनि कतिपय श्यया नपाएर अन्यत्र गएका छन् । कतिपय बिरामी श्ययाका लागि कुरेर श्यया बाहिर बस्ने गरेका छन् । एउटा चिकित्सकले ४५ जनासम्म बिरामीको उपचार गर्ने भनिएकोमा पछिल्लो समय एउटा चिकित्सकले कम्तीमा १०० देखि १५० सम्म बिरामी जाँच गर्नुपरेको अस्पतालले जनाएको छ ।

दैनिक ५०–६० बच्चाको स्वास्थ्य जाँच भइरहेको उक्त अस्पतालमा हाल १५० सम्म बच्चा बिरामी भएर आउने गरेका छन् । बच्चामा डेङ्गु, स्क्रबटाइफसलगायत समस्या देखिएका छन् । अस्पतालको आकस्मिक कक्षमा रहेको आठ श्ययामा २० भन्दा बढी बिरामी राख्नुपरेको अस्पतालले जनाएको छ । अस्पतालले नयाँ निर्माणाधीन भवन तयार नभएसम्म अझै १० महीनासम्म अस्पतालको हालको समस्यालाई व्यवस्थापन गर्न कठिनाइ हुने जनाएको छ ।