तिलगंगा आँखा अस्पतालमा ‘डिप स्ट्रेपिङ्ग इन्डोथेलियल केराटोप्लान्टी’ प्रविधिबाट आँखा प्रत्यारोपण

हेल्थ टुडे,
काठमाडौ,२९ कात्तिकः तिलगंगा आँखा अस्पतालले एक जनाको आँखाबाट ४ जनालाई दृष्टि दिने प्रविधि भित्राएको छ । अस्पतालले १० महिनाअघि नै एक व्यक्तिको आँखाको नानी निकालेर चार जनालाई दृष्टि दिन सकिने ‘डिप स्ट्रेपिङ्ग इन्डोथेलियल केराटोप्लान्टी’ नामक अन्तराष्ट्रिय प्रबिधि भित्राएको हो । यो प्रविधिबाट एक व्यक्तिका दुइटा आँखाले चार जनालाई दृष्टि दिन सकिने अस्पतालले जनाएको छ ।
यो प्रविधि भित्र्याउनुअघि एक व्यक्तिको आँखा दुई जनालाई मात्रै प्रत्यारोपण गर्न सकिन्थ्यो । यो प्रविधिबाट नानीको कुन भागमा समस्या भएको हो पहिल्याएर, सोही भाग मात्रै प्रत्यारोपण गर्न सकिन्छ। नानीका पाँच तह हुन्छन्। उक्त प्रविधिबाट कुन तहमा समस्या भएको हो, सोही पत्रमा मात्र प्रत्यारोपण गर्न सकिने हुँदा एक व्यक्तिको २ आँखा ४ जनालाई प्रत्यारोपण गर्न सम्भव भएको हो ।
यो प्रविधिबाट हालसम्म ६० जनालाई सेवा दिइएको अस्पताल व्यवस्थापकले जनाएको छ । प्रविधि भित्रिएपछि १५ जना व्यक्तिबाट ३० वटा आँखा संकलन गरेर ६० जनालाई प्रत्यारोपण गरिएको छ । प्रविधि भित्रिए पनि नानी प्रत्यारोपणको तालिम प्राप्त चिकित्सकको कमि, प्रत्यारोपणमा आवश्यक साधनको कमिका कारण सोचेजति प्रत्यारोपण गर्न नसकिएको जनाइएको छ ।
अहिले आँखा प्रत्यारोपण गराउनसक्ने चिकित्सक १२ जना मात्रै छन्।यो प्रविधिबाट प्रत्यारोपणलाई अझै शशक्त रुपमा लैजान प्रत्येक प्रदेशमा आँखा संकलन केन्द्र बनाउने, आँखा प्रत्यारोपण गर्नसक्ने चिकित्सक उपलब्ध गराउने, तालिम गराउन ‘रिकभरि सेन्टर’को संचालन लगायतका योजना रहेको अस्पतालले जनाएको छ ।