विदेश जाने कार्यक्रम कसैको पुर्खेउली पेसा होइन : स्वास्थ्य मन्त्री ढकाल

हेल्थ टुडे,
भक्तपुर, १८ मंसिर : स्वास्थ्य तथा जनसंख्या मन्त्री भानुभक्त ढकालले स्वास्थ्य मन्त्रालयबाट पटक पटक विदेश जाने गरेका कर्मचारीहरुलाई इंगित गर्दै विदेश जाने कार्यक्रमलाई कसैले पुर्खेउली पेसा बनाउन नहुने बताएका छन् । स्वास्थ्य तथा जनसंख्या मन्त्रालयले बुधबार भक्तपुरको कृषि विकास बैंक तालिम केन्द्र, बोडेमा आयोजना गरेको राष्ट्रिय बार्षिक समिक्षाको अवसरमा मन्त्री ढकालले सो कुरा बताएका हुन । मन्त्री ढकालले भने, ‘स्वास्थ्य मन्त्रालयबाट एकै कर्मचारी पटक पटक विदेश जाने गरेको पाइएको छ । विदेश जाने कार्यक्रमलाई कसैले पनि पुर्खेउली पेसा ठान्नु हुदैन । केन्द्रका कर्मचारीले मात्र नभएर प्रदेश र स्थानिय तहका कर्मचारीले पनि मौका पाउनु पर्छ । ’ स्वास्थ्य क्षेत्रमा कार्यरत विभिन्न दातृ निकायहरुले पनि पटक पटक सँगै गइरहेका कर्मचारीसंग विदेश जादा सजिलो हुन्छ भन्ने ठानेर एउटैलाई अवसर दिनु गलत भएको समेत मन्त्री ढकालले बताए । स्वास्थ्य मन्त्रालयमा अधिकांश सह सचिव र उपसचिव स्तरका पहूचवाला कर्मचारीहरुले मात्र विदेश जाने अवसर पाउने गरेकोले यसको विरोध हुने गरेको छ । कार्यक्रममा स्वास्थ्य तथा जनसंख्या मन्त्रालयले गत आर्थिक वर्षमा गरेका प्रगतिको समिक्षा भइरहेको छ । विभिन्न विभाग र महासाखाहरुले आ आफ्नो प्रगति विवरण पेश गरिरहेका छन । समिक्षा बिहीबार सम्पन्न हुने छ । बुधबारको समिक्षामा औषधि व्यवस्था विभाग, आयुर्वेद विभाग, स्वास्थ्य विमा बोर्ड, शहरी विकास, निजी योजना महासाखा, स्वास्थ्य सेवा विभाग लगायतका विभाग र महासाखाले कार्यप्रगति विवरण पेस गरेका छन ।