चीनको पक्ष लिएको आरोप लगाउदै अमेरिकाले डब्लुएचओलाई दिँदै आएको आर्थिक सहयोग रोक्यो

हेल्थ टुडे,
काठमाडौं, ३ बैशाख : विश्वमा फैलिएको कोरोना भाइसरको महामारीलाई रोक्न ठोस कदम चाल्न नसकेको र चीनको पक्ष लिएको आरोप लगाउदै विश्व स्वास्थ्य संगठन (डब्लुएचओ) लाई दिँदै आएको आर्थिक सहयोग रोक्ने निर्णय गरेको छ । कोरोना भाइरसको महामारी सुरु भएदेखि नै डब्लूएचओको काम कारवाही प्रति अमेरिकी राष्ट्रपति डोनाल्ड ट्रम्पल सन्तुष्ट थिएनन । उनले पटक पटक चेतावनी दिए पनि डब्लुएचओले त्यसलाई नमाोका कारण सहयोग रासी कटौती गरिएको हो ।
नियमित प्रेस बिफ्रिङमा अमेरिकी राष्ट्रपति डोनाल्ड ट्रम्पले भने, ‘डब्लुएचओको भूमिकाको समीक्षा गरियो, तर प्रभावकारी काम गर्न असफल रह्यो । त्यसैले मैले मेरो प्रशासनलाई डब्लुएचओलाई दिँदै आएको सहयोग रोक्न निर्देशन दिएको छु ।’
ट्रम्पले डब्लुएचओले चीनको पक्ष लिएको र कोरोना भाइरसबारे गलत सूचना दिएको आरोप लगाए । डब्लुएचओको गल्तीकै कारण विश्वभर कोरोना भाइरसका कारण धेरैले ज्यान गुमाइरहेको ट्रम्पको ठहर छ । उनले यसको जिम्मेवारी डब्लुएचओले लिनुपर्ने बताए ।
डब्लुएचओ संयुक्त राष्ट्रसंघ अन्तर्गतको संस्था हो । अमेरिका यसको एकमात्र ठूलो दाता राष्ट्र हो । गत वर्ष अमेरिकाले डब्लुएचओलाई ४ सय मिलियन डलर उपलब्ध गराएको थियो । यो डब्लुएचओको कूल बजेटको करिब १५ प्रतिशत हो । (ऐजेन्सीको सहयोगमा । )