स्वास्थ्य सचिव कोइरालाको ३ महिना नबित्दै सरुवा, नयाँ स्वास्थ्य सचिवको जिम्मेवारी अर्याललाई

हेल्थ टुडे,
काठमाडौं, १५ जेठ : सरकारले ३ महिना नबित्दै स्वास्थ्य तथा जनसंख्या मन्त्रालयका सचिव यादव कोइरालाको सरुवा गरेको छ । कोइरालालाई प्रधानमन्त्री तथा मन्त्रीपरिषद् कार्यालयमा सरुवा गरेर उनको ठाउँमा प्रधानमन्त्री तथा मन्त्रीपरिषद् कार्यालयका सचिव लक्ष्मण अर्याललाई पठाइएको छ । पछिल्लो मन्त्रीपरिषद्ले कोइराला र अर्यालको सरुवा गरेको हो । कोइरालाले गत फागुन ११ गते स्वास्थ्य तथा जनसंख्या मन्त्रालयको सचिवको जिम्मेवारी सम्हालेका थिए । कोरोना महामारीको सामना गरिरहेको बेला त्यसको रोकथाम, नियन्त्रण र उपचारमा प्रत्यक्ष सम्बन्ध राख्ने स्वास्थ्य तथा जनसंख्या मन्त्रालयको सचिवलाई बिचमै सरुवा गरिनुलाई अर्थपूर्ण रुपमा हेरिएको छ । छोटो समयमा सचिव सरुवा गर्दा मन्त्रालय मातहतको कर्मचारीतन्त्र अस्थिर हुने विज्ञहरुले बताएका छन । आफ्नो सरुवा भएको सुनेको भए पनि बिहीबार मध्यान्हसम्म सरुवाको पत्र पाइनसकेको बताए । उनले भने, ‘म अहिले स्वास्थ्य मन्त्रालयमै छु । सरुवाको कुरा बाहिरबाट सुनेको छु । पत्र पाइसकेको छैन । ’ ३ महिना नबित्दै आफूलाई सरुवा गरेको प्रति सचिव कोइरालाले असंतुष्टि जनाएका छन । यसरी ३ महिना समेत नबित्दै सरुवा गर्नु कर्मचारीलाई जिस्क्याएको जस्तो भएको उनले प्रतिकृया दिए । केही समय पहिले सचिव कोइरालाले एक टेलिभिजन कार्यक्रममा सरुवा रोग अस्पताल टेकुका सरुवारोग विज्ञ डा. शेरबहादुर पुनका विरुद्ध तल्लो स्तरको शब्द प्रयोग गरेका थिए । १८ बर्षदेखि करारमा रहेको डा. पुनलाई आफूले करार थप नगरेर जागिरबाट हटाइदिनसक्ने बताएका थिए । त्यसको नेपाल चिकित्सक संघ लगायत चिकित्सा क्षेत्रले बिरोध गरेका थिए ।