राजधानी बाहिर पहिलोपटक चितवन मेडिकल कलेजमा  कलेजो प्रत्यारोपण

हेल्थ टुडे,

चितवन, १२ चैत :  चितवन मेडिकल कलेज (सिएमसी) ले राजधानी बाहिर  पहिलोपटक कलेजो प्रत्यारोपण (लिभर ट्रान्सप्लान्ट) गरेको छ । सिएमसीले चैत ८ गते आइतबार ५४ वर्षीया धनकुमारी लामाको कलेजो प्रत्यारोपण गरेको हो ।  उनकै ३३ वर्षीया छोरीले कलेजो दान दिएको मेडिकल कलेजले जनाएको छ ।

भारतको नयाँ दिल्लीस्थित एपोलो अस्पतालका डा. निरभ गोयल, डा.अरुणकुमार र डा. सञ्जिव अनिजाको सहयोगमा कलेजो प्रत्यारोपण सम्पन्न भएको थियो ।  प्रत्यारोपणमा अस्पतालका विशेषज्ञ चिकित्सकहरु सर्जन डा. सञ्जय यादव, डा. एकानन्द सिंह, डा. प्रविन जोशी, डा. जयन्तकुमार साह, डा. अभिषेक भट्टराई, एनेस्थेसियोलोजिस्ट डा. किरण अधिकारी, डा.सुरेश गौतम, डा.नविन यादव, डा. सागर पौडेल र डा. वरुण श्रेष्ठ खटेका थिए । धनकुमारीको कलेजो काम गर्न नसक्ने गरेर बिग्रिएको थियो । त्यसैले प्रत्यारोपणको विकल्प थिएन,’ सिएमसीका अध्यक्ष तथा प्रबन्ध निर्देशक प्रा.डा. हरिशचन्द्र न्यौपानेले भने ।

नेपालमा ५ वर्षअघि कलेजो प्रत्यरोपणको सेवा सुरुवात भएको हो । नेपालमा पहिलो पटक भक्तपुरस्थित शहिद धर्मभक्त राष्टिय प्रत्यारोपण केन्द्रले कलेजो प्रत्यारोपण सेवा सुरु गरेको थियो । त्यसको दुई वर्ष पछि त्रिवि शिक्षण अस्पतालले यो सेवा सुरु गरेको थियो । अहिलेसम्म १० जनाको कलेजो प्रत्यारोपण भइसकेको छ ।कलेजो प्रत्यारोपणको खर्च २५ लाख रुपैयाँ लाग्ने अस्पतालले जनाएको छ । यो विदेशको भन्दा सस्तो हो ।