डेढ बर्षपछि बल्ल स्वास्थ्यमा चिकित्सक सचिव, स्वास्थ्य तथा जनसंख्या मन्त्रालयको सचिवमा डा. पोखरेल नियुक्त

हेल्थ टुडे,

काठमाडौं, ४ साउन  : स्वास्थ्य तथा जनसंख्या मन्त्रालयको सचिवमा प्रमुख विशेषज्ञ डा. रोसन पोखरेल नियुक्त भएका  छन् ।  प्रधानमन्त्री शेरबहादुर देउवाको अध्यक्षतामा सोमबार बसेको मन्त्रीपरिषद्को बैठकले स्वास्थ्य तथा जनसंख्या मन्त्रालयको प्राविधिक सचिवमा डा. पोखरेललाई नियुक्त गर्ने निर्णय गरेको हो । सचिव पदमा नियुक्तीका लागि स्वास्थ्य सेवाका बाह्रौ तहका डा. पोखरेलसँगै डा. दीपेन्द्ररमण सिंह र महेन्द्र श्रेष्ठ प्रतिष्पर्धामा थिए ।  स्वास्थ्यमा प्रशासन र प्राविधिक गरेर दुई वटा सचिवको दरबन्दी छ । अहिलेसम्म लक्ष्मण अर्यालले स्वास्थ्य सचिवको जिम्मेवारी सम्हालिरेहका छन् ।  मन्त्रालयमा प्रमुख विशेषज्ञको रुपमा कार्यरत डा. पोखरेलले छ महिना स्वास्थ्य सेवा विभागको महानिर्देशक र त्यो भन्दा पहिले कोशी अञ्चल अस्पतालमा लामो समय काम गर्नु भएको छ । ओली नेतृत्वको सरकारले चिकित्सकलाई सचिव बनाउन अनिच्छा देखाएको थियो ।डेढ बर्षदेखि स्वास्थ्यमा प्राविधिक सचिवको दरबन्दी खाली थियो । डा. पुष्पा चौधरीले केपी ओली नेतृत्वको सरकारसँग खटपट भएपछि राजिनामा दिए पछि उक्त पद खाली थियो ।