साडे ४६ लाखले लगाए कोरोनाको पूर्ण खोप, पहिलो खोपमात्र लगाउनेको संख्या ५४ लाख

हेल्थ टुडे,

काठमाडौं, १७ भदौ  : नेपालमा अहिलेसम्म साडे ४६ लाख व्यक्तिले कोरोना विरुद्घको पूर्ण खोप लगाइसकेका छन् । स्वास्थ्य तथा जनसंख्या मन्त्रालयका अनुसार ४६ लाख ६७ हजार ३२८ जनाले पूर्ण खोप लगाएका छन् । खोप लक्षित जनसंख्याको यो संख्या १५.४ प्रतिसत हो । त्यसैगरि पहिलो मात्रा खोप लगाउनेको संख्या ५४ लाख २४ हजार रहेको छ । यो लक्षित जनसंख्याको १७.९ प्रतिसत हो । पहिलो मात्रा मात्र लगाउने र पूर्ण खोप लगाउने दुबै गरि ३३.३ प्रतिसत जनसंख्याले खोप लगाएका छन् ।

राज्यले  २ करोड १७ लाख ५६ हजार ७६३ जनालाई खोप दिने योजना बनाएको छ । सोही लक्ष्य अनुसार खोप कार्यक्रम सञ्चालन भइरहेको स्वास्थ्यका अधिकारीले बताएका छन् । सरकारले पहिलो चरणमा भारतबाट आयात गरिएको कोभिसिल्ड, त्यसपछि चीनबाट आयात गरिएको भेरोसेल, अमेरिकाबाट ल्याइएको जोन्सन एण्ड जोन्सन र जापानबाट आयात गरिएको आस्ट्राजेनेका खोप लगाउने गरेको छ । सरकारले  यी सबै खोप निशुल्क लगाउने गरेको छ । आगामी चैतसम्म लक्षित समूह सबैलाई खोप लगाइसक्ने सरकारको योजना रहेको स्वास्थ्य तथा जनसंख्या राज्यमन्त्री उमेश श्रेष्ठले बताए । उनले भने, ‘चैत भित्रै लक्षित समूहलाई खोप लगाइसक्ने गरि मन्त्रालयले खोप खरिद गर्ने र लगाउने कामलाई तिब्रता दिएको छ । ’