नेपाल अंग प्रत्यारोपण समाजको सिएमई सम्पन्न

हेल्थ टुडे,
काठमाडौं,२ असोज : नेपाल अंग प्रत्यारोपण समाज (नेजलीज सोसाइटी अफ ओर्गान ट्रान्सप्लान्टेसन) ले एक दिने सिएमई (कन्टिन्यूइङ मेडिकल एजुकेशन) शनिबार ललितपुरमा सम्पन्न गरेको छ । नेपाल अंग प्रत्यारोपण समाजका अध्यक्ष एवं वरिष्ठ अंग प्रत्यारोपण विज्ञ डा. पुकारचन्द्र श्रेष्ठको अध्यक्षता भएको सिएमईमा समाजका सदस्यहरु र स्वदेशी र विदेशी विज्ञ चिकित्सकहरुको सहभागिता थियो ।

समाजका अध्यक्ष डा. श्रेष्ठले नेपालमा पछिल्ला वर्षमा अंग प्रत्यारोपणका क्षेत्रमा प्रगति हुदै गइरहेकोमा खुशी व्यक्त गर्दै अझै नयाँ नयाँ प्रविधिको माध्यमबाट राजधानी बाहेक देशका अन्य भागमा पनि अंग प्रत्यारोपण सेवा विस्तारका लागि प्रयास भइरहेको बताए ।
कार्यक्रममा कार्यपत्र प्रस्तुत गर्दै रगत रोग विज्ञ डा. विशेष पौडेलले रगत सम्बन्धी रोगको उपचारमा देखिएका समस्या र अहिले भइरहेका प्रयासका बिषयमा जानकारी गराएका थिए । नेपालमा रगत रोग विज्ञको अभाव र रोग निदान केन्द्रको अभावका कारण धेरै विरामीले उपचारका लागि विदेश जानु परिहेको जानकारी गराउदै डा. पौडेलले बोन म्यारो प्रत्यारोपण सेवालाई बिस्तार गर्नु अहिलेको आवश्यकता भएको बताए ।

शहीद धर्मभक्त रा. प्रत्यारोपण केन्द्रका मिर्गौला रोग विशेषज्ञ डा. सुरेश महर्जनले नेपालमा बर्षेनी ३ हजार जनाको मिर्गौला फेल हुने गरेको जानकारी गराउदै मुस्किलले ३ सयको मात्र प्रत्यारोपण भइरहेको बताए । अमेरिकाको सिकागो स्थित स्टोन्जर हस्पिटलका इन्टरनल मेडिसिन विज्ञ डा. चन्द्रप्रकाश चटौतले सिकलसेल एनिमियाका बिषयमा प्रकाश पारेका थिए भने वरिष्ठ सर्जन डा. राकेश बर्माले अंग प्रत्यारोपणका बिषयमा जनचेतना बिस्तारका बिषयमा आफ्ना भनाई राखेका थिए । सिएमईमा ३० भन्दा बढी चिकित्सकहरु सहभागी थिए ।