दुई महिनापछि बल्ल पायो स्वास्थ्य मन्त्रालयले मन्त्री

हेल्थ टुडे,
काठमाडौं, २१ बैसाख : दुई महिनापछि बल्ल स्वास्थ्य तथा जनसंख्या मन्त्रालयले मन्त्री पाएको छ । बुधबार प्रधानमन्त्री पुष्पकमल दाहालको सिफारिसमा राष्ट्रपति रामचन्द्र पौडेलले मोहन बहादुर बस्नेतलाई स्वास्थ्य तथा जनसंख्या मन्त्रीमा नियुक्त गरेपछि स्वास्थ्य मन्त्रालयले मन्त्री पाएको हो । गत फागुन १५ गते तत्कालिन स्वास्थ्य तथा जनसंख्या मन्त्री पदम गिरीसहित एमालेबाट सरकारमा सहभागी भएका सबै मन्त्रीले राजिनामा दिए पछि बिगत दुई महिना भन्दा बढी समयदेखि स्वास्थ्य मन्त्रालय मन्त्री विहिन थियो । मन्त्री नहुदा स्वास्थ्य मन्त्रालयले बजेट माग गर्ने लविङदेखि नीति निर्माणमा समेत बिलम्ब भएको थियो । नव नियुक्त मन्त्री बस्नेतले आजै दिउसो ३ गते राष्ट्रपति रामचन्द्र पौडेलसमक्ष पद तथा गोपनियताको सपथ खाने र त्यसपछि मन्त्रालयमा पद बहाली गर्ने कार्यक्रम रहेको बस्नेतको निजी सचिवालयले जनाएको छ । स्वास्थ्य मन्त्रालयमा राज्यमन्त्री समेत रहने परम्परा रहे पनि अहिलेसम्म स्वास्थ्य राज्यमन्त्री भने नियुक्त गरिएको छैन । बस्नेत नेपाली कांग्रेसका लोकप्रिय नेता हुन । उनी सिन्धुपाल्चोकबाट निर्वाचित सांसद हुन । यो भन्दा पहिले पनि उनले स्वास्थ्य राज्यमन्त्री र सूचना मन्त्रीको जिम्मेवारी निर्वाह गरिसकेका छन् ।