स्वास्थ्य मन्त्री बस्नेत निकै ‘ इनरजेटिक एण्ड डाइनामिक ’ मन्त्री हुन : प्रधानमन्त्री

हेल्थ टुडे,
काठमाडौं, २६ साउन : प्रधानमन्त्री पुष्पकमल दाहाल (प्रचण्ड) ले स्वास्थ्य तथा जनसंख्या मन्त्री आफ्नो मन्त्रीपरिषद्मा सबैभन्दा बढी उर्जावान र गतिशील मन्त्री भएको बताएका छन् । स्वास्थ्य तथा जनसंख्या मन्त्री बस्नेतले मन्त्रीको पदभार सम्हालेको १०० दिन पुगेको अवसरमा शुक्रबार राजधानीमा आयोजित कार्यक्रममा प्रधानमन्त्री दाहालले स्वास्थ्य मन्त्री बस्नेत लय सम्हालेर काम अगाडि बढाएको बताए ।
स्वास्थ्य मन्त्री बस्नेतले गरेका स्वास्थ्य सुधारका कामबाट मन्त्री परिषद्का सदस्यहरु समेत निकै प्रभावित भएको बताउदै प्रधानमन्त्री दाहालले भने, ‘ क्याविनेटमा स्वास्थ्य मन्त्रीले आफुले गरेका कामको ब्रिफिङ गर्दा उहाँको काम देखेर सबै मन्त्री प्रभावित हुन्छन । ’ स्वास्थ्य मन्त्री बस्नेतको स्वास्थ्य सुधारको योजना र कार्यशैलीबाट आफू प्रभावित भएको प्रधानमन्त्री दाहालले बताए । मन्त्री बस्नेतले स्वास्थ्य क्षेत्रमा उदाहरणीय काम गरेकै कारण आफू हौसला प्रदान गर्न कार्यक्रममा आएको प्रधानमन्त्री दाहालले बताए । सबै मन्त्रीहरुसँग आफुले कार्यसम्पादन सम्झौता गरेको जानकारी दिदै मन्त्री बस्नेत नेतृत्वको स्वास्थ्य मन्त्रालयले १०० प्रतिसत सफलता प्राप्त गर्ने विश्वास व्यक्त गरे ।
नेपालको नर्सिङ क्षेत्रमा निकै समस्या रहेको औल्याउदै प्रधानमन्त्रीले यसमा निजीगत सुधार गरेर पढ्नका लागि विदेश जानु पर्ने र त्यतैबाट रोजगारीका लागि विदेशिनु पर्ने अवस्थाको अन्त्य गर्न आफू लागिपरेको बताए । कार्यक्रममा स्वास्थ्य तथा जनसंख्या मन्त्री बस्नेतले १०० दिनको कार्यकालमा आफूले विपन्नको निशुल्क उपचारका लागि संघीय अस्पतालका साडे ३ हजार बेड निशुल्क गरेको, भिआईपी तथा भिभिआईपीका लागि वीर अस्पतालका उपचार कक्ष थप गरेको, वित्ति रणनीति र स्वास्थ्य रणनीति पास गरेको, निजी अस्पतालमा समेत १० प्रतिशत बेड विपन्नका लागि निशुल्क गर्नै पर्ने व्यवस्था कडाइका साथ लागु गरेको लगायतका काम गरेको बताउदै आउदो ६ महिनामा जनताले महसुस हुने गरि स्वास्थ्यमा सुधारका काम गर्ने दावी गरे । कार्यक्रममा राष्टिय योजना आयोगका सदस्य डा. आरपी बिच्छाले स्वास्थ्यका नीति बनाउदा योजना आयोगले सहजिकरण गर्ने बताए । स्वास्थ्य तथा जनसंख्या मन्त्रालयका सचिव डा. रोसन पोखरेलले स्वास्थ्य मन्त्री बस्नेतको नेतृत्वमा मन्त्रालयले धेरै काम अगाडि बढाएको बताउदै नेतृत्व गतिलो भएपछि कर्मचारीले दायाँबाया गर्ने अवस्था नआउने बताए । कार्यक्रममा स्वास्थ्य मन्त्रालयका अधिकारी, विभिन्न अस्पतालका कर्मचारी, चिकित्सक, दातृ निकायका प्रमुखहरु सहितको ठूलो सहभागिता थियो ।