प्रसूति गृहको विस्तारित विशिष्टिकृत सेवा कुपण्डोलको नयाँ भवनबाट सुरु हुँदै

हेल्थ टुडे,
काठमाडौं, १ फागुन : थापाथलीस्थित परोपकार प्रसूति तथा स्त्री रोग अस्पताल (प्रसूति गृह) ले कुपण्डोलमा निर्माण गरिएको नवनिर्मित भवनबाट आफ्नो विशिष्टिकृत सेवा बिस्तार गर्ने भएको छ । थापाथलीमा रहेको पुरानो भवनमा स्थान अभावका कारण सहज रुपमा विशिष्टिकृत सेवा उपलब्ध गराउन समस्या झेलीरहेको प्रसूति गृहलाई गुणस्तरीय सेवा प्रदान गर्न यो भवनले ठूलो राहत दिने छ ।
४३ करोड ७९ लाख ६७ हजार रुपैयाको लागतमा निर्माण सम्पन्न भएको पाँच तले उक्त सेवा बिस्तार तथा अध्ययन अनुसन्धान भवनको फागुन २ गते श्रीपञ्चमीको दिन स्वास्थ्य तथा जनसंख्या मन्त्री मोहनबहादुर बस्नेतले औपचारिक उदघाटन गरेपछि बिस्तारित सेवा सञ्चालनमा आउने छ । नयाँ भवनमा केही दिनमै ओपिडी सेवा, सुरक्षित गर्भपतन सेवा, परिवार योजना सेवा सहित विशिष्टिकृत सेवा सञ्चालनमा आउने परोपकार प्रसूति तथा स्त्री रोग अस्पताल (प्रसूति गृह) का निर्देशक डा.श्रीप्रसाद अधिकारीले जानकारी दिए । डा. अधिकारीका अनुसार पाठेघरको क्यान्सरको जाँच, पिसाव चुहिने समस्या, टेष्ट ट्युव बेबी सेवा लगायतका सेवा यही भवनबाट सञ्चालन हुने छन् । डा. अधिकारीले भने, ‘यसका अलावा उक्त भवनमा १२० जना नर्सिङ अध्ययनरत विद्यार्थीहरुका लागि छात्रवासको समेत व्यवस्था गरिएको छ । ’ प्रसूति तथा स्त्रीरोग सम्बन्धी तालिममा सहभागी हुन दुरदराजबाट आउने गरेका स्वास्थ्यकर्मी र चिकित्सकहरुका लागि आवासको व्यवस्था पनि उक्त भवनमा गरिएको डा.अधिकारीले बताए ।
एक महिनाभित्र यी सबै सेवा सञ्चालनमा आउने डा. अधिकारीले जानकारी दिए । यो सेवा बिस्तार र अध्ययन अनुसन्धान भवन ४ वर्ष ८ महिनामा निर्माण सम्पन्न भएको हो । भवनको ग्राउण्ड फ्लोरमा ओपिडी सेवा, ल्याव, फार्मेसी र रिसेप्सन रहने छ भने पहिलो तलामा सुरक्षित गर्भपतन सेवा, परिवार योजना सेवा, माइनर ओटी, जनरल ओटी रहने छ । दोश्रो तलामा प्रशासन साखा, बैठक कक्ष र तालिम कक्ष रहेका छन् । त्यसैगरि तेश्रो र चौथो तलामा नर्सिङ पढ्ने १२० जना विद्यार्थीहरुका लागि आवासको व्यवस्था गरिएको छ । पाँचौ तलमा प्रसूति तथा स्त्री रोग सम्बन्धी बिभिन्न तालिममा सहभागी हुन आउने स्वास्थ्यकर्मीका लागि आवासको व्यवस्था गरिएको छ । भवनमा किचेन र डाइनिङ हलको व्यवस्था पनि गरिएको छ । यो भवन सञ्चालनमा आएपछि प्रसूति गृहलाई आफ्ना विशिष्टिकृत सेवा बिस्तार गर्न ठूलो सहयोग पुग्ने निर्देशक डा. अधिकारीले बताए ।