ट्रमा सेन्टरको प्रमुख मेडिकल सुपरिटेन्डेन्टको जिम्मेवारी डा. रिजाललाई

हेल्थ टुडे,
काठमाडौं, २५ मंसिर : ट्रमा सेन्टरको प्रमुख मेडिकल सुपरिटेन्डेन्टमा डा. बद्री रिजाल नियुक्त भएका छन् । स्वास्थ्य तथा जनसंख्या मन्त्री प्रदीप पौडेलले मन्त्रीस्तरिय निर्णय गर्दै हाडर्जोनी विशेषज्ञ डा. रिजाललाई उक्त जिम्मेवारी दिएका हुन । डा. रिजालले ६ महिना पहिले एक वर्षसम्म ट्रमा सेन्टरको प्रमुख मेडिकल सुपरिटेन्डेन्टको भूमिका सफलताका साथ सम्पन्न गरिसकेका छन् । डा. रुद्र मरासिनीलाई हटाएर डा. रिजाललाई ट्रमाको प्रमुख मेडिकल सुपरिटेन्डेन्ट नियुक्त भएका हुन । अब डा. मरासिनीले भने सेन्टरमा विशेषज्ञ चिकित्सकका रुपमा कार्य गर्नेछन् । त्यसैगरि स्वास्थ्य तथा जनसंख्या मन्त्रालय मातहात निकायका केही उच्च कर्मचारीको जिम्मेवारी समेत हेरफेर गरेको जनाएको छ । स्वास्थ्य सेवा विभाग अन्तरगत व्यवस्थापन महाशाखामा कार्यरत डा. सुरेन्द्र चौरसियालाई उपचारात्मक महाशाखा सरुवा गरिएको छ । चौरसियाको स्थानमा मन्त्रालयको समन्वय महाशाखामा कार्यरत दयाकृष्ण पन्तलाई पठाइएको छ ।
यसैगरी टेकु अस्पतालमा रहेकी रोशनी लक्ष्मी तुईतुईलाई वीर अस्पताल नर्सिङ क्याम्पस प्रमुख बनाइएको छ ।