किशोरावस्थाको स्वास्थ्य र महिनावारी सम्बन्धी स्कुल नर्सहरूलाई प्रशिक्षक प्रशिक्षण

हेल्थ टुडे,
काठमाडौं,२० माघ : किशोरावस्थाको स्वास्थ्य र महिनावारी सम्बन्धी स्कुल नर्सहरुकालागि आयोजित ३ दिने प्रशिक्षक प्रशिक्षण आईतबार सम्पन्न भएको छ । बाग्मती प्रदेश स्वास्थ्य तालिम केन्द्रको सहयोगमा स्वास्थ्य शिक्षा, जनचेतना तथा अधिकार,नेपाल (हियर नेपाल) ले आयोजना गरेको प्रशिक्षणमा बाग्मती प्रदेश अन्तरगत भक्तपुरका २५ जना स्कूल नर्सहरुको सहभागिता रहेको थियो । यो प्रशिक्षण तिन चरणमा गरि बाग्मती प्रदेशका २०० जना स्कूल नर्सहरुलाई प्रशिक्षण दिइने आयोजकले जनाएको छ । प्रशिक्षण समापनका अवसरमा बोल्दै बाग्मती प्रदेश स्वास्थ्य तालिम केन्द्रका निर्देशक दीपक तावारीले स्कूल नर्सहरुलाई स्वास्थ्यका विविद पक्षबारे थाहा भए पनि किशोरावस्थाको स्वास्थ्य र महिनावारीका विषयमा तालिमले उमेर अनुसार प्रदान गर्नु पर्ने स्वास्थ्य शिक्षाका विषयमा अझ प्रभावकारी भएको विचार व्यक्त गरे । उनले यस किसिमको प्रशिक्षण देशभरि कै नर्सहरुलाई दिनु पर्ने आवश्यकता रहेको औल्याए । आयोजक संस्था स्वास्थ्य शिक्षा, जनचेतना तथा अधिकार, नेपाल (हियर नेपाल) का अध्यक्ष माधव जोशीले स्कूल नर्सहरु स्वास्थ्य सूचनाका सच्चा सम्बाहक भएको दावी गर्दै उनीहरुको क्षमता बढाउन राज्यले ध्यान दिनु पर्ने बताए । प्रशिक्षक नर्वदा थापाले प्रशिक्षणले स्कूल नर्सहरुको ज्ञानको दायरा अझ फराकिलो भएकोमा जोड दिइन । कार्यक्रममा स्वास्थ्य शिक्षा विज्ञहरु कृष्णबहादुर चन्द र कुञ्जप्रसाद जोशीले पनि स्वास्थ्य सचेतनाका विविद पक्षबारे स्कूल नर्सहरुलाई प्रशिक्षण दिएका थिए । कार्यक्रम समापनका अवसरमा स्कूल नर्सहरुलाई प्रमाणपत्र वितरण गरिएको थियो ।