‘नेपालको लागि नेपाली चिकित्सक’ भन्ने नाराका साथ चिकित्सक संघले स्थापना दिवस मनाउदै

हेल्थ टुडे,
काठमाडौं, १९ फागुन : ‘नेपालको लागि नेपाली चिकित्सक’ भन्ने नाराका साथ भोली फागुन २० गते मंगलबार नेपाल चिकित्सक संघको ७५ औं स्थापना दिवस मनाइने भएको छ । स्थापना दिवसमा संघले राजधानीमा आयोजना गर्ने विशेष कार्यक्रमको राष्ट्रपति रामचन्द्र पौडेलले उदघाटन गर्नु हुने छ । संघले पत्रकार सम्मेलनको आयोजना गरि सो जानकारी गराएको हो । नेपाल चिकित्सक संघका महासचिव डा. संजीव तिवारीका अनुसार कार्यक्रममा नेपालको चिकित्सा क्षेत्रमा अतुलनिय योगदान गरेका वरिष्ठ ५ जना चिकित्सकहरुलाई अवार्ड सहित सम्मान गरिने छ । यसका साथै कार्यक्रममा चिकित्सक संघको इतिहास झल्काउने वृतचित्र पनि प्रदर्शन गरिने छ । नेपाल चिकित्सक संघका वरिष्ठ उपसभापति डा. बद्री रिजालले स्वदशी चिकित्सकहरुको योगदान र भूमिकालाई बढी महत्व दिएर संघले स्थापना दिवस मनाउन लागेको बताए । नेपाली चिकित्सकहरुको छाता संगठनको रुपमा नेपाल चिकित्सक संघको स्थापना विसं २००७ साल फागुन २० गते भएको हो । अहिले संघमा करिव १० हजार जति चिकित्सक सदस्य छन् ।