नेपाल नेत्रज्योति संघ र थाइल्याण्डको महिडोल विश्वविद्यालयबिच सम्झौता पत्रमा हस्ताक्षर

हेल्थ टुडे,
काठमाडौं, २० चैत : नेपाल नेत्रज्योति संघ र थाइल्याण्डको महिडोल विश्वविद्यालयबिच आँखा हेरचाह सेवाहरू, ज्ञान आदानप्रदान र प्राविधिक सहकार्यलाई सुदृढ पार्ने सम्झौता पत्रमा हस्ताक्षर भएको छ । प्रधानमन्त्री केपी शर्मा ओलीको थाइल्याण्ड भ्रमणका क्रममा बुधबार थाइल्याण्डमा हस्ताक्षर भएको हो । थाइल्याण्डमा बिमस्टेक शिखर सम्मेलनको क्रममा प्रधानमन्त्री ओली र थाइल्याण्डका प्रधानमन्त्री पेतोङटार्न सिनावात्राको उपस्थितिमा औपचारिक रूपमा सम्झौता सम्पन्न भएको थियो । नेपाल नेत्रज्योति संघको तर्फबाट केन्द्रीय अधयक्ष प्रा. डा. चेतराज पन्तले उक्त सम्झौता पत्रमा हस्ताक्षर गरेका हुन । नेपाल नेत्र ज्योति संघका कार्यकारी निर्देशक डा.शैलेस मिश्रका अनुसार यो साझेदारीले आँखा हेरचाह सेवाहरू, ज्ञान आदानप्रदान र प्राविधिक सहकार्यलाई सुदृढ पार्ने लक्ष्य राखेको छ । डा. मिश्रले आँखा स्वास्थ्यको लागि एक ऐतिहासिक साझेदारी भएको बताए ।