एचओटिसीको १३ औं वार्षिकोत्सव सम्पन्न, वैदेशिक रोजगारीबाट फर्केकाका लागि निःशुल्क ओपीडी सुरु

हेल्थ टुडे,

काठमाडौँ ११ बैशाख : शहीद धर्मभक्त राष्ट्रिय प्रत्यारोपण केन्द्र भक्तपुरले बिहीबार स्थापनाको १३ औं वार्षिकोत्सव मनाएको छ । सो अवसरमा केन्द्रले वैदेशिक श्रमिक रोजगारीबाट फर्केकाहरुको लागि निःशुल्क ओ.पि.डि. क्लिनिक सेवा शुरु गरेको छ । स्वास्थ्य तथा जनसंख्या मन्त्री प्रदीप पौडेलले उक्त ओपिडी क्लिनिकको उद्घाटन गरे । यसका साथै केन्द्रले २४ घण्टा परामर्श सेवा पनि सञ्चालन गरेको छ ।
समारोहलाई सम्बोधन गर्दै स्वास्थ्य तथा जनसंख्या मन्त्री पौडेलले वैदेशिक रोजगारीमा जाने नेपालीले आफ्नो अंग फेल हुनबाट बचाउन आवश्यक सल्लाह केन्द्रबाट पाउन सक्ने बताए । उनले नेपालमा मात्र नभइ वैदेशिक रोजगार गएको अवस्थामा आफ्नो स्वास्थ्य सम्बन्धि सेवाको परार्मश सहज होस भन्नको लागि टोल फ्रि कल वा सोसियल मिडियाको प्रयोग गरि विदेशवाट समेत परार्मश लिन सक्ने व्यवस्था मिलाइएको बताए ।
उनले यो सेवा श्रम रोजगार मन्त्रालय र स्वास्थ्य मन्त्रालयको सहकार्य हुने गरी सुरु गरिएको समेत जानकारी दिए । उनले वैदेशीक रोजगारवाट व्यक्तिको स्वास्थ्य परीक्षण सुलभ र सहज रुपमा उपलब्ध गराउनको लागि छुट्टै निःशुल्क ओ पि. डि सेवा प्रारम्भ गरिएको बताए ।
वैदेशिक रोजगारीमा गएका व्यक्तिहरु अंग फेल हुने समस्या बढी देखिएको भन्दै उनले आफूले सबै भन्दा बढी माया गर्ने आफ्नै शरीर बचाउनको लागि यो अभियान सुरु गरिएको जानकारी दिए ।
उक्त कार्यको लागि मोबाइल नं ९७६३४९०९०० मा ह्वाट्स एप र भाईबर सहितको सेवा चौविसै घण्टा उपलब्ध गराइएको छ ।
केन्द्रका कार्यकारी निर्देशक डा. पुकारचन्द्र श्रेष्ठले केन्द्रले अंग प्रत्षरोपणका क्षेत्रमा गरेको प्रगतिका विषयमा जानकारी गराउदै देशका विभिन्न भागमा मिर्गौला प्रत्यारोपण सेवा विस्तारमा एक पछि अर्को गर्दै सफलता पाउन थालेकोमा खुशी व्यक्त गरे । सरकारले नीति र योजना अनुसार केन्द्रले काम गरिेरहेको बताउदै डा. श्रेष्ठले भौतिक संरचनाको अभावमा काम गर्नु पर्दा आवश्यकता अनुसार सेवा विस्तार गर्न नसकिएको गुनासो गरे । केन्द्रले अहिलेसम्म १४ सयभन्दा बढीको मिर्गौला प्रत्यारोपण गरेको भने दुई दर्जनभन्दा बढीको कलेजो प्रत्यारोपण गरेको छ ।