हेल्थ टुडे,
काठमाडौं, साउन १३ : वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको सांघातिक आक्रमणको विरोधमा चिकित्सकहरुले माइतिघरमा विरोध प्रदर्शन गरेका छन । नेपाल चिकित्सक संघको अगुवाईमा भएको प्रदर्शनमा चिकित्सकहरुले शान्ति सुरक्षाको माग गर्दै प्लेकार्ड बोकेर प्रदर्शन गरेका हुन ।
उनीहरुले वीरगन्ज घटनामा चिकित्सक र स्वास्थ्यकर्मीमाथि हातपात गर्ने र घटनामा संलग्न दोषीलाई कानुनबमोजिम तत्काल कारबाही गर्न सरकारसँग माग गरेका छन् । नेपाल चिकित्सक संघका महासचिव डा. विश्वराज दवाडीले सरकारले चिकित्सकहरुको सुरक्षालाई बेवास्ता गरेकाले बाध्य भएर सडकमा आउनु परेको बताए । वीर अस्पतालमा वरिष्ठ न्युरो सर्जन डा. राजीव झाले सरकारले चिकित्सकलाई अस्पतालमा भयरहित वातावरणमा काम गर्ने वातावरण नबनाएसम्म अवस्था साम्य नहुने बताए । जुनै सरकारले पनि चिकित्सकको सुरक्षालाई ध्यान दिन नसकेको र अहिलेको सरकार पनि पहिलेका सरकार भन्दा भिन्न नरहेको उनले बताए ।
चिकित्सक संघले नारायणी अस्पतालको आकस्मिक कक्षमा उपचारका क्रममा चिकित्सक र स्वास्थ्यकर्मीमाथि भएको आक्रमण अत्यन्त दुःखद र निन्दनीय भएको जनाएको छ । वार्ताका क्रममा प्रमुख जिल्ला अधिकारीको उपस्थितिमा प्रहरी परिचालन गरी संघका केन्द्रीय कार्यसमिति सदस्य तथा नारायणी शाखाका अध्यक्षसहित चिकित्सकमाथि गरिएको दुव्र्यवहार प्रति पनि गम्भीर आपत्ति जनाएको छ ।
संघका अनुसार घटनामा गम्भीर चोट लागेका चिकित्सक डा. प्रमोद रामसहित अन्य चिकित्सक र स्वास्थ्यकर्मीमाथि सांघातिक आक्रमण गर्ने व्यक्तिहरूलाई अविलम्ब पक्राउ गरी ’स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन, २०७९)’ बमोजिम कडा कारबाही गर्नुपर्ने माग गरिएको छ । साथै चिकित्सकको मानमर्दन गर्ने कार्यमा संलग्न भएको भन्दै सम्बन्धित प्रमुख जिल्ला अधिकारी र प्रहरी प्रमुखमाथिसमेत आवश्यक कारबाही गर्न सरकारसँग आग्रह गरेको छ । नेपाल चिकित्सक संघले चिकित्सक तथा स्वास्थ्यकर्मीमाथि हुने यस्ता घटनाको विरोधस्वरूप साउन १३ गते मंगलबार देशभरका अस्पतालमा आकस्मिक सेवाबाहेकका सेवा बन्द गर्ने निर्णय गरेको थियो । उक्त सेवा आज बुधबार पनि बन्द छ ।
संघले आन्दोलनका क्रममा बिरामीलाई पर्न जाने असुविधाप्रति क्षमा याचना गर्दै त्यसको जिम्मेवारी नेपाल सरकारले लिनुपर्ने उल्लेख गरेको छ ।
Leave a Reply