भारतबाट किनेको १० लाख डोज कोभिड १९ विरुद्धको खोप आइपुग्यो,पालैपालो सबैलाई खोप

हेल्थ टुडे,

काठमाडौं, ९ फागुन : नेपाल सरकारले भारतको सेरम इन्ष्टिच्युटबाट अग्रिम पैसा भुक्तानी दिएको किनेको कोभिड १९ विरुद्धको १० लाख डोज खोप आज काठमाडौं आइपुगेको छ । एयर इन्डियाको विमानबाट उक्त कोभिशिल्ड खोप दिउँसो त्रिभुवन विमानस्थल आइपुगेको हो । सेरमसंग २० लाख डोज खोप किन्ने निर्णय गरेको भए पनि पहिलो लटमा १० लाख डोज आइपुगेको हो । अर्को १० लाख डोज छिट्टै आइपुग्ने स्वास्थ्य तथा जनसंख्या मन्त्रालयका अधिकारीले बताएका छन् । भारत सरकारले १० लाख डोज खोप अनुदानमा दिएपछि नेपालले १४ माघदेखि कोरोना खोप अभियान सुरु गरेको थियो ।

शिक्षक र सार्वजनिक यातायातका चालक र सहचालकले पनि कोरोना खोप लगाउन पाउने भएका छन् । महाविद्यालयका प्राध्यापक, शिक्षक तथा कर्मचारी, सार्वजनिक यातायातका चालक तथा सहचालकले फागुन २३ गतेदेखि कोरोना खोप लगाउन पाउनेछन् । स्वास्थ्य तथा जनसंख्या मन्त्रालयले २३ फागुनबाट जेष्ठ नागरिकलाई खोप दिने निर्णय गरिसकेको छ ।