कांग्रेस नेता नवीन्द्रराज जोशीको स्वास्थ्यमा सामान्य सुधार, शरीरको दाहिने भाग चल्न थालेको डा. झाको भनाई

हेल्थ टुडे,

काठमाडौँ, १५ फागुन : मस्तिष्कघात भएपछि नर्भिक हस्पिटलमा उपचाररत पूर्व उद्योग मन्त्री एवं नेपाली कांग्रेसका नेता नवीन्द्रराज जोशीको स्वास्थ्यमा सुधार देखिएको छ ।  उपचारमा संलग्न नर्भिक अस्पतालका न्युरोसर्जन डा.राजीव झाले जोशीको स्वास्थ्यमा हिजोको तुलनामा सामान्य सुधार देखिएको बताएका छन् । तर जोशीको अवस्था अझै खतरामुक्त भने नरहेको उनले जानकारी दिएका छन् ।

शनिबार बिहान जोशीको शरीरको दायाँ भाग चल्न थालेको डा. झाले बताए । डा. झाका अनुसार शनिबार बिहानदेखि बेहोस बनाउने औषधि चलाउन छोडेको छ । ‘आज हामीले न्युरोलोजी एसेस गरेका छौं । बिहानदेखि बेहोस बनाउने औषधि चलाउन छाडेका छौं । आज उहाँको स्पोन्टेनियस रेस्पिरेसन रेट ६–७ वटा छ । सामान्यतया हुनुपर्ने १२–१५ वटा हो । उहाँमा यो ५० प्रतिशत देखिएको छ ।’  त्यस्तै दायाँपट्टिको भाग र हातखुट्टा चले पनि बायाँ भागमा भने प्यारालाइसिस हुने संभावना रहेको  डा. झाले बताए । अस्पतालले कुनै कसर बाकी नराखी जोशीको उपचार गरिरहेको डा. झाको भनाई छ ।  ‘शनिबार बिहानदेखि दायाँपट्टिको शरीरको भाग हातखुट्टाहरु चल्न थालेका छन् । देब्रेपट्टि प्यारालाइसिस भएकै देखिन्छ । बाँकी प्यारामिटरहरु ठीकै ठीकै छ ।  हिजोभन्दा केही सुधार भएको देखिन्छ तर खतरामुक्त भने हुनुहुन्न । अवस्था अलि गम्भीर नै छ । ’ उनले भने ।

जोशीलाई बिहीबार राति मस्तिष्कघात भएपको थियो । अहिले उनको नर्भिक अस्पतालको आईसीयूको भेन्टिलेटरमा राखेर उपचार गरिँदैछ ।