आयात रोक्ने निर्णय स्थगित, सँयुक्त आन्दोलन घोषणा

सरकारले ३५ प्रकारका औषधि आयातमा रोक लगाउने निर्णयको विरोधमा आन्दोलनरत नेपाल औषधि आयातकर्ता संघ (मियान) ले अत्यावश्यक औषधिको आयात ठप्प पार्ने र  विलिङ बन्द गर्ने निर्णय केही दिनका लागि  स्थगित गर्दै सयुक्त आन्दोलन अगाडि बढाउने निर्णय गरेको छ ।  मियानले सुरु गरेको आन्दोलनमा औषधि विक्रीबितरणका क्षेत्रमा क्रियाशिल नेपाल औषधि तथा विक्री प्रतिनिधि संघ, नेपाल औषधिगत बिक्री प्रवन्धक संगठन र नेपाल खाद्य, आयुर्वेदिक न्युट्रास्विटिकल्स तथा कस्मेस्विटिक समाजले पूर्ण ऐक्यवद्दता जनाएपछि आन्दोलन संयुक्त र ससक्त रुपमा अगाडि बढ्ने मियानका महासचिव पवन आयार्चले बताए । नेपाल औषधि व्यवसायी संघले पनि आन्दोलनका पक्षमा विज्ञप्ति जारी गरेको छ ।

मियानले जेठ ७ गते औषधिको विलिङ बन्द गर्ने र जेठ ८ गतेदेखि विदेशबाट आयात हुने अत्यावश्यक औषधिको आयात ठप्प पार्ने गरि गत हप्ता आन्दोलनको घोषणा गरेको थियो । औषधि विक्रीबितरण क्षेत्रमा क्रियाशिल प्रमुख संगठनहरुले आन्दोलन प्रति ऐक्यवद्दता जाहेर गर्दै समर्थन गरे पनि औषधि आयात ठप्प पार्ने र विलिङ बन्द गर्ने निर्णय केही दिनका लागि पछाडि सार्न आग्रह गरे पछि संघले आफ्नो पूर्वघोषित निर्णयमाथि पुनर्विचार गर्ने हो । मियानका महासचिव पवन आचार्यले जनताको अनुरोध  र औषधि व्यवसाय क्षेत्रका क्रियाशिल प्रमुख संगठनको आग्रह पछि  पूर्वघोषित निर्णयमा पुनर्विचार गरिएको बताए । उनले भने, ‘ हाम्रा आन्दोलनका कार्यक्रम स्थगित गरेका होइनौ । आयत बन्द गर्ने कार्यक्रम मात्र केही दिन स्थगित गरेका हौ । सरकारले हाम्रा जायज माग सम्बोधन नगरेसम्म आन्दोलनका कार्यक्रम अझ ससक्त भएर अगाडि बढेछन ।’ आन्दोलनका भावी कार्यक्रमका बिषयमा सबै पक्षसंग बसेर निर्णय लिइने उनले बताए ।

औषधि विक्रीबितरणका क्षेत्रमा क्रियाशिल नेपाल औषधि तथा विक्री प्रतिनिधि संघ, नेपाल औषधिगत बिक्री प्रवन्धक संगठन र नेपाल खाद्य, आयुर्वेदिक न्युट्रास्विटिकल्स तथा कस्मेस्विटिक  समाजले शनिबार छुट्टा छुट्टै विज्ञप्ति जारी गर्दै मियानको आन्दोलनमा आफूहरुको पूर्ण समर्थन र सहकार्य रहने जनाउदै जनताको स्वास्थ्यलाई ध्यानमा राख्दै अत्यावश्यक औषधिको आयात ठप्प गर्ने र विलिङ बन्द गर्ने घोषित कार्यक्रम तत्कालका लागि स्थगित गर्न आग्रह गरेका हुन् । संघका महासचिव अनुप पाण्डे, संगठनका केन्द्रिय अध्यक्ष सुरजितदत्त र समाजका अधयक्ष सुरेन्द्र मानन्धरले विज्ञप्ति निकालेका हुन । मियानले औषधि व्ववस्था विभागमा ज्ञापनपत्र बुझाउने, कालोपट्टी बाधेर धर्ना दिने, विभाग घेराउ गर्ने जस्ता आन्दोलनका कार्यक्रम सम्पन्न गरि सकेको छ । मियानले स्वदेशी औषधि कम्पनीले उत्पादन गर्ने औषधिको बिक्री मूल्य र लागत मूल्यको फरक सार्वजनिक गर्न पनि सरकारसँग माग गरेको छ ।