औषधिको निर्णय फिर्ता लिन राज्यमन्त्रीलाई ज्ञापन

सरकारले ३५ प्रकारका औषधि आयातमा रोक लगाउने निर्णयको विरोधमा आन्दोदनरत नेपाल औषधि आयातकर्ता संघ (मियान) सहित नेपाल औषधि तथा विक्री प्रतिनिधि संघ, नेपाल औषधिगत बिक्री प्रवन्धक संघ, नेपाल खाद्य, आयुर्वेदिक न्युट्रास्विटिकल तथा कस्मास्विटिकल समाज, नेपाल भेटेनरी औषधि आयातकर्ता संघ र पशुपंछी आषधि व्यवसायी संघले राजधानीमा वृहत विरोध र्याली आयोजना गर्दै स्वास्थ्य राज्यमन्त्री तारामान गुरुङलाई भेटी ज्ञापनपत्र बुझाएका छन ।

औषधि व्यवस्था विभाग बिजुलीबजारबाट सुरु भएको र्याली माइतीघरमा पुगेर कोणसभामा परिणत भएको थियो । विरोध र्यालीमा सहभागीहरुले स्वास्थ्य मन्त्री गगन थापाले औषधिमा आत्मनिर्भरका नाममा केही स्वदेशी औषधि कम्पनीको प्रलोभनमा परेर सस्तो र गुणस्तरीय औषधिको आयात बन्द गरेर एकाधिकार लाद्न खोजेकोले निर्णय फिर्ता नलिएसम्म आन्दोलन जारी रहने बताए । आन्दोलनको नेतृत्व गरिरहेको नेपाल औषधि आयातकर्ता संघका अध्यक्ष अञ्जन पुडासैनीले सरकारले बेलैमा निर्णय नसच्याए आन्दोलन अझ ससक्त हुने बताए । उनले भने, ‘ जनताले गुणस्तरीय औषधि सस्तोमा पाउनु पर्छ । यो या त्यो नाममा आयात बन्द गरेर जनताको अधिकार र हजारौलाई बेरोजगार पाइदैन । ’

औषधि व्यवस्था विभागका महानिर्देशक नारायण ढकालको अध्यक्षतामा गठन गरिएको कार्यदलले दिएको सुझाव अनुसार स्वास्थ्य मन्त्री थापाले ३५ प्रकारका औषधिको आयात रोक्ने निर्णय गरेको सूचना सार्वजनिक भएपछि औषधि आयातकर्ता आन्दोलनमा उत्रिएका हुन । उनीहरुले औषधि व्यवस्था विभागमा कालोपट्टी बाधेर धर्ना दिनेदेखि घेराउ र ज्ञापन पत्र बुझाउने कार्यक्रम सम्पन्न गरिसकेका छन । मियानका महासचिव पवन आचार्यले मन्त्री थापाले सस्तो लोकप्रियताका लागि औषधिमा २२ सय प्रतिसतसम्म मुनाफा लिने गरेको भ्रमपूर्ण सूचना सार्वजनिक गरेर बदमान गर्न खोजेको आरोप लगाए ।