स्वास्थ्य मन्त्री यादवद्वारा नारायणी अस्पतालको अनुगमन, सेवा सुधार्न निर्देशन

हेल्थ टुडे,
काठमाडौँ, २९ जेठ : स्वास्थ्य तथा जनसंख्या मन्त्री प्रदीप यादवले मंगलबार गृह नगर वीरगञ्जस्थित नारायणी अस्पतालको अनुगमन गरेका छन् ।
मंगलबार बिहान वीरगञ्ज पुगेका स्वास्थ्य मन्त्री यादवले मधेस प्रदेशको पुरानो र प्रमुख अस्पतालको रूपमा परिचित नारायणी अस्पतालको बहिरंग सेवा, अस्पताल फार्मेसी, प्रयोगशालालगायत अस्पतालका विभिन्न साखाहरुको अनुगमन गर्दै अस्पतालमा उपचाररत बिरामी र विरामीहरुक कुरुवासँग समेत साक्षात्कार गरेका थिए । मन्त्री यादवले अस्पतालले प्रदान गरिरहेको सेवाका विषयमा विरामीसँग कुराकानी गरेका थिए ।
सो क्रममा मन्त्री यादवले विरामी र उनीहरुका कुरुवाहरुसन्ग उपचार, चिकित्सक र स्वास्थ्यकर्मीहरूले गर्ने व्यवहार, औषधीको उपलब्धता र अस्पतालमा उपलब्ध अन्य सेवाको गुणस्तरका बारेमा जानकारी लिएका थिए । बिरामीहरूले अस्पतालस्थित फार्मेसीमा सबै प्रकारका औषधी उपलब्ध नरहेको, ओपिडी टिकट काट्ने काउन्टरमा बढी भिडभाड रहेको, चिकित्सकहरू ओपिडीमा पर्याप्त समय नदिने गरेको जस्ता गुनासो गरेका थिए । मन्त्री यादवले बिरामीले गरेका गुनासोलाई यथाशीघ्र सम्बोधन गर्न अस्पतालका मेडिकल सुपरिटेन्डेन्ट (मेसु) डा.एनामुल हकलाई निर्देशन दिए । फार्मेसीमा औषधीको व्यवस्थापनका लागि मन्त्रालयसँग बजेट माग गर्न र ओपिडी सेवाका लागि आउने बिरामीको सहजताका निमित्त टिकट काउन्टर थप्दै सो स्थानलाई वातानुकूलित बनाउन पनि निर्देशन दिए ।
अनुगमन पश्चात् मन्त्री यादवले अस्पताल विकास समितिका सदस्य, मेसु, चिकित्सक र अन्य स्वास्थ्यकर्मीहरूसँग पनि छलफल गरेका थिए ।
मन्त्री यादवले मेसु डा. एनामुल हकलाई अस्पतालका विद्यमान समस्याहरूको सूची तयार पारेर छिटै मन्त्रालय आउन निर्देशन पनि दिएका छन् । अनुगमनमा सहभागी वीरगञ्ज महानगरपालिकाका मेयर राजेशमान सिंहले नारायणी अस्पतालको स्तरोन्नतिलाई आफ्नो प्रमुख एजेण्डा बनाएर काम गर्न मन्त्री यादवलाई आग्रह गरे । मन्त्री यादव मंगलबार नै काठमाडौं फर्किएका छन् ।