मंगलबार पनि आकस्मिक बाहेकको उपचार ठप्प, चिकित्सक सडकमा

हेल्थ टुडे,
काठमाडौं, २४ असार : नेपाल चिकित्सक संघको अगुवाईमा भइरहेको चिकित्सक आन्दो्लनका कारण मंगलबार पनि देश भरिका प्रमुख अस्पतालहरुले प्रदान गर्ने सेवा ठप्प भएको छ । आकस्मिक बाहेकका सेवा प्रभावित भएपछि हजारौ विरामीले उपचार पाउन सकेका छैनन् । उपभोक्ता अदालतले चिकित्सक र अस्पताललाई दोषी करार गर्दै उनीहरुका विरुद्व फैसला गरेको भन्दै चिकित्सकहरु सडकमा उत्रिएका हुन । चिकित्सक आन्दोलनकै कारण हिजो आईतबार पनि आकस्मिक बाहेकका सेवा ठप्प भएका थिए । चिकितसकले सेवा ठप्प पार्दा समेत सरकारले वार्ता वा आन्दोलन रोक्न कुनै ठोस पहिल गरेको छैन ।
उपभोक्ता अदालतले चिकित्सकीय अभ्याससम्बन्धी पछिल्ला मुद्दामा सुनाएको फैसलाले नेपाल मेडिकल काउन्सिलको क्षेत्राधिकारमाथि हस्तक्षेप भएको भन्दै नेपाल चिकित्सक संघले आकस्मिक बाहेकका सेवा ठप्प पार्दा दैनिक ४ लाखभन्दा बढी बिरामी स्वास्थ्य सेवाबाट वञ्चित भएका छन् ।मंगलबार यो विषयले संसदमा पनि प्रवेश पाएको छ । नेपाली कांग्रेसका प्रमुख सचेतक श्याम घिमिरेले चिकित्सक आन्दोलनका कारण चिकित्सक सडकमा आएपछि उपचार सेवा ठप्प हुदा समेत सरकारले त्यसको समाधानका लागि पहल नगरेको भन्दै तत्काल समस्या समाधान गर्न सल्लाह दिएका छन् । स्वास्थ्य तथा जनसंख्या मन्त्रालयले पनि उपभोक्ता अदालतको फैसला विरुद्व जान नसकिरहेकोले चिकित्सक आन्दोलन सम्बोधन गर्न विज्ञप्ति समेत निकाल्न सकिरहेको छैन । सरकारले चिकित्सक आन्दोलन समाधान गर्न आनाकाना गरे आफै चिकित्सकहरुले आफ्नो लाइसेन्स नेपाल मेडिकल काउन्सिललाई बुझाउने तयारी संघले गरेको छ । नेपाल चिकित्सक संघका अध्यक्ष डा. अनिलविक्रम कार्कीले इमेल मार्फत चिकित्सकहरुका लाइसेन्स जम्मा गर्न लागिएको र संकलन गरिएपछि आजै मेडिकल काउन्सिलाई बुझाउने तयारी भएको बताएका छन् ।
मंगलबार अस्पतालको सेवा बन्द गरेर काठमाडौं उपत्यकाका चिकित्सक माइतीघरमा जम्मा भएका छन् । काठमाडौं बाहिर भने संघको शाखामा भेला हुने र स्वास्थ्य संस्थामा धर्ना दिने कार्यक्रम छ ।