हेल्थ टुडे,
काठमाडौं, १४ साउन : चिकित्सकमाथि भएको आक्रमणको विरोधमा दुई दिनसम्म बन्द रहेको बहिरङ्ग (ओपीडी) सेवा बिहीबारदेखि पुनः सञ्चालन भएपछि काठमाडौं उपत्यकाका प्रमुख सरकारी अस्पतालहरूमा बिरामीको अत्यधिक चाप देखिएको छ ।
बिहानैदेखि त्रिवि शिक्षण अस्पताल, वीर अस्पताल, पाटन अस्पताल, सिभिल अस्पताल, कान्ति बाल अस्पताल तथा परोपकार प्रसूति तथा स्त्रीरोग अस्पतालमा टिकट काट्ने काउन्टरदेखि ओपीडी कक्षसम्म बिरामी र कुरुवाको लामो लाइन लागेको थियो । दुई दिनसम्म उपचारका लागि पर्खिएका नियमित फलोअपका बिरामी, नयाँ बिरामी तथा विभिन्न परीक्षणका लागि आएका सेवाग्राही एकैदिन अस्पताल पुगेपछि चाप बढेको अस्पतालहरूले जनाएका छन्।
ओपीडी सेवा बन्द हुँदा नियमित उपचारमा रहेका दीर्घरोगी, मुटु, मधुमेह, क्यान्सर, मिर्गौला तथा अन्य जटिल रोगका बिरामी सबैभन्दा बढी प्रभावित भएका थिए। धेरै बिरामी निर्धारित मितिमा चिकित्सकसँग परामर्श लिन नपाएकाले सेवा पुनः सुरु हुन बित्तिकै अस्पताल पुगेका हुन् । ’आज सामान्य दिनभन्दा धेरै बिरामी आएका छन्। दुई दिनको सेवाको चाप एकैदिन परेको देखिन्छ ।
बिरामीलाई सकेसम्म सहज रूपमा सेवा दिने व्यवस्था मिलाइएको छ,’ त्रिवि शिक्षण अस्पतालका निर्देशक डा. सुभाष आचार्यले भने । अस्पतालमा पुगेका केही बिरामीले उपचार सेवा पुनः सञ्चालन भएकोमा राहत महसुस गरे पनि लामो समय लाइनमा बस्नुपरेको गुनासो गरेका छन् । ’दुई दिनदेखि उपचार रोकिएको थियो। आज बिहानैदेखि लाइनमा बसेपछि बल्ल चिकित्सकलाई देखाउन पाएँ,’ उपचारका लागि गोर्खाबाट आएका विरामी मिना पोखरेलले भनिन ।
नेपाल मेडिकल एसोसिएसन र सरकारबीच चिकित्सकको कार्यस्थल सुरक्षा सुनिश्चित गर्ने तथा दोषीमाथि कानुनी कारबाही अघि बढाउने सहमतिपछि देशभर बन्द रहेका नियमित स्वास्थ्य सेवा पुनः सञ्चालनमा आएका हुन् । आन्दोलनका क्रममा आकस्मिक सेवा भने निरन्तर सञ्चालनमा रहेको थियो । स्वास्थ्य विज्ञहरूका अनुसार दुई दिनको सेवा अवरोधका कारण रोकिएका बिरामीको संख्या धेरै भएकाले आगामी केही दिनसम्म काठमाडौंका ठूला अस्पतालहरूमा बिरामीको चाप सामान्यभन्दा बढी रहने सम्भावना छ । त्यसका लागि अस्पतालहरूले अतिरिक्त जनशक्ति परिचालन, सेवा व्यवस्थापन र बिरामीको भीड नियन्त्रणमा विशेष ध्यान दिनुपर्ने आवश्यकता देखिएको छ । अधिकांश अस्पतालमा बिहान ८ बजेदेखि नै टिकट काउन्टरमा सेवाग्राहीको भीड देखिएको थियो भने ओपीडी कक्षबाहिर पालो पर्खिने बिरामीको संख्या पनि उल्लेख्य थियो । अस्पताल प्रशासनले बिरामीलाई धैर्यतापूर्वक पालोअनुसार सेवा लिन आग्रह गरेको छ ।
Leave a Reply