चिकित्सकले लापरवाही गरेको आरोप लगाउदै कपिलबस्तुमा प्रदर्शन

हेल्थ टुडे
कपिलवस्तु, साउन १४ : कपिलवस्तु नगरपालिका–७ धमौलीकी ३० वर्षीया जनरमती यादवको उपचारका क्रममा मृत्यु भएको घटनालाई लिएर परिवार र स्थानीयवासी आन्दोलनमा उत्रिएका छन् । उनीहरूले चिकित्सकको लापरवाहीका कारण जनरमतीको मृत्यु भएको आरोप लगाउँदै दोषीमाथि कडा कारबाही, निष्पक्ष छानबिन तथा पीडित परिवारलाई उचित क्षतिपूर्तिको माग गरेका छन् । मृतकका पति राजेशकुमार यादवको नेतृत्वमा स्थानीयवासीले बिहीबार जिल्ला प्रशासन कार्यालय कपिलवस्तु अगाडि विरोध प्रदर्शन गरेका हुन् । प्रदर्शनका क्रममा उनीहरूले केही समय सडक अवरुद्ध गर्दै घटनाको सत्यतथ्य सार्वजनिक गर्न सरकारसँग माग गरेका थिए । प्रदर्शनकारीहरूले दोषीलाई कारबाही नभएसम्म आन्दोलनका कार्यक्रमलाई निरन्तरता दिने चेतावनीसमेत दिएका छन् ।

मृतकका श्रीमान् राजेशकुमार यादवका अनुसार जनरमती यादवलाई साउन ७ गते प्रसूति गराउन कपिलवस्तु अस्पताल लगिएको थियो । शल्यक्रिया (सिजेरियन) मार्फत बच्चा सकुशल जन्मिए पनि अपरेसनपछि जनरमतीको स्वास्थ्य अवस्था गम्भीर बन्दै गएको उनले बताए ।
राजेशकुमार यादवको आरोप अनुसार कपिलवस्तु अस्पतालमा उपचारमा संलग्न चिकित्सकको लापरवाहीका कारण श्रीमतीको अवस्था बिग्रिएको थियो । त्यसपछि थप उपचारका लागि उनलाई भैरहवास्थित मेडिकल कलेजमा रेफर गरिएको भए पनि उपचारकै क्रममा तीन दिनअघि उनको मृत्यु भएको उनले बताए

“हाम्रो बच्चा सकुशल जन्मियो, तर श्रीमतीलाई बचाउन सकिएन । घटनाको निष्पक्ष छानबिन होस्, दोषीलाई कानुनअनुसार कारबाही गरियोस् र पीडित परिवारलाई न्याय दिइयोस्,“ प्रदर्शनका क्रममा राजेशकुमार यादवले माग गरे । स्थानीयवासीले पनि घटनालाई सामान्य रूपमा लिन नहुने भन्दै प्रसूति सेवाजस्तो संवेदनशील क्षेत्रमा हुने सम्भावित लापरवाहीप्रति सरकारले गम्भीर बन्नुपर्ने बताएका छन् । उनीहरूले स्वास्थ्य संस्थामा बिरामीको सुरक्षालाई पहिलो प्राथमिकतामा राख्नुपर्ने र यस्ता घटनाको निष्पक्ष अनुसन्धान गरी दोषीमाथि कानुनी कारबाही हुनुपर्ने माग गरेका छन् । प्रदर्शनका कारण जिल्ला प्रशासन कार्यालय आसपास केही समय तनावपूर्ण अवस्था सिर्जना भएको थियो। सुरक्षाकर्मीको उपस्थितिमा प्रदर्शन शान्तिपूर्ण रूपमा सम्पन्न भएको जनाइएको छ ।

यस घटनाप्रति स्वास्थ्यकर्मी तथा अस्पताल प्रशासनको आधिकारिक धारणा भने समाचार तयार पार्दासम्म प्राप्त हुन सकेको छैन । कपिलवस्तु अस्पतालले घटनाबारे औपचारिक प्रतिक्रिया सार्वजनिक गरेका छैन । यद्यपि, स्वास्थ्य सेवा सम्बन्धी कुनै पनि गम्भीर घटनामा सत्यतथ्य पत्ता लगाउन चिकित्सकीय छानबिन आवश्यक हुने भएकाले सम्बन्धित निकायबाट निष्पक्ष अनुसन्धान गरी वास्तविक कारण सार्वजनिक गर्नुपर्ने माग स्थानीयस्तरमा बढ्दै गएको छ । पीडित परिवारले घटनाको न्यायिक छानबिन, दोषीमाथि कडा कानुनी कारबाही, उपचार प्रक्रियामा भएको भनिएको लापरवाहीको सत्यतथ्य सार्वजनिक गर्न तथा उचित क्षतिपूर्ति उपलब्ध गराउन सरकारसँग आग्रह गरेको छ ।