कान्ति बाल अस्पतालका निर्देशक डा. पंकज राय हटाइए

हेल्थ टुडे,
काठमाडौ, १९ साउन :  कान्ति बाल अस्पतालका निर्देशक डा. पंकज रायलाई निर्देशक पदबाट हटाइएको छ । स्वास्थ्य तथा खाद्य स्वच्छता मन्त्री निशा मेहताले मन्त्रीस्तरीय निर्णय गर्दै उनलाई निर्देशकको जिम्मेवारीबाट मुक्त गरेकी हुन । डा. रायले निर्देशकको जिम्मेवारीमै रहेको बेला निजी क्षेत्रको अस्पताल ह्याम्समा सेवा दिने गरेको समाचार प्रमाण सहित बाहिरिए पछि स्वास्थ्य मन्त्री मेहताले उनलाई स्पष्टिकरण सोधेकी थिइन । तर उनले चित्तबुझ्दो जवाफ दिएका थिएनन् । गत हप्ता नेपाल चिकित्सक संघले ओपिडी सेवा बन्द गरेर सडक आन्दोलन गरेको दिन समेत कान्तिका विरामी जाच्न छाडेर डा. राय सरकारी गाडीमा कार्यालय समयमै विरामी जाच्न ह्याम्स अस्पताल पुगेका थिए । उनी ह्याम्स पुगेको भिडियो सहित हेल्थ टुडेका संवाददाता मनोज आचार्यले प्रशारण गरेका थिए ।  भिडियो भाइरल भएपछि स्वास्थ्य मन्त्रालयले उनलाई स्पष्टिकरण सोधेको थियो । डा. राय विगत ३ वर्षदेखि कान्तिको निर्देशक थिए ।